1 God, yu irrim main preya.
2 Irrim mi en ensim mi.
3 Ol main enami olabat toktok blanga kilim mi,
4 Mi bradin brabliwei,
5 Mi bradin nomo lilbit en mi sheiksheik.
6 If ai bina abum wing wulijim det pijin,
7 Ai bina flai longwei en meigim main kemp langa deset.
8 Kwikbalawei ai bina faindim main ronwan pleis blanga kipum miselp seifwan brom det strongwan win en bigwan rein.
9 Bos, yu meigim main enami olabat tok garram difrindifrin langgus, wulijim dei kaan andasten miselp,
10 Olkain trabul jidan deitaim en naitaim.
11 Ola nogudbala pipul meigim trabul en dumbat nogudbala ting ebriweya langa det taun.
12 If im bina main enami mokimbat mi,
13 Bat im yu, main brabli gud fren! Yu main wekinmeit en yunmi bin oldei jidan mijamet!
14 Yunmi bin oldei toktok gija,
15 Larram ol main enami olabat binijap kwikbala.
16 Bat mi jingat langa YAWEI det trubala God blanga album mi,
17 Ailibala, dinataim en naitaim, mi jingat en toktok langa im blanga main trabul en pein,
18 Im garra bringimbek mi seifwan brom det bigwan fait langa ol main enami olabat nomeda olabat jidan bigismob.
19 God na, hu jidan bos olagijawan,
20 Main gudfren brom bifo bin fait langa im fren olabat,
21 Imbin swit tok,
22 Libum ol yumob trabul langa YAWEI,
23 Bat yu na God garra meigim ol detlot pipul hu oldei medrimbat enibodi, en ol detlot laiyinbala pipul godan langa greib wen olabat stil yangbala en strongbala.