1 Wamracuna, taytayqui willapäshushayquitaga sumaj wiyacunqui.
2 Nogaga allimi yachachishcä.
3 Nogapis mama taytawanmi goyashcä.
4 Papänëmi yachachimar willapämar cayno nimaj:
5 Yachaj canayquipaj willapashäcunataga sumaj wiyacuy.
6 Yachaytaga fiyupa cuyanqui. Ama cachaycunquichu.
7 Imatapis cachaycur rimëruga yachaytaraj umayquiman sumaj churay tantiyaj canayquipaj.
8 Yachayta cuyaptiqui yachayga allimanmi churashunquipaj.
9 Nishäcunata wiyacorga sumaj adurnashanömi caycanquipaj.
10 Ïju, llapan willapashäcunata sumaj wiyacuy.
11 Quiquëmi llapan yachachishäcunata sumaj tantiyachishayqui.
12 Alli caminupa purerga manami mana alliman chayanquipächu.
13 Willapar yachachishushayquicunataga umayquiman sumaj churacuy.
14 Mana allita ruraj runacunamanga ama tallupaychu.
15 Paycuna goturashanmanga ama yaycapanquichu.
16 Mana allita rurananpaj yarpashanta manaraj rurashancamaga
17 Paycunaga mishquilla micuycaj-nirajmi mana allita ruran.
18 Alli runacuna alli goyashanga caycan pacha warämur achicyajnömi.
19 Juchasapacuna mana alli goyashanmi ichanga caycan fiyupa manchacuypaj yanauyaycaj chacayno.
20 Ïju, willapashäcunataga sumaj wiyacuy.
21 Tantiyachishäcunata ruraytaga ama gongaychu.
22 Willapashäcunami wiyacojcunataga alli goyayta tarichin.
23 Ima-aycayquitapis cuydashayquipita masta cuyday shonguyquicho yarpashayquicunata.
24 Umayquipita jorgurcur manacajcunataga ama rimanquichu.
25 Chayanayquipaj cajllaman yarparay.
26 Mayman japaycashayquitapis sumaj ricay.
27 Alli caminupa puriycashayquipitaga janaman ni uramanpis ama yaycunquichu.