1 Yachaj yarpaysapa warmiga wasincho cushisha goyächiytami yachan.
2 Allita rurar goyäga Tayta Diostami sumaj rispitan.
3 Mana tantiyacojcunaga alli-tucushpanmi parlan.
4 Yunta mana captenga micuytapis wallcallatami murupacun.
5 Alli testïgoga mana llullacuyllapami riman.
6 Mana rispitacoj runaga yachaj cayta munarpis manami camäpacunchu.
7 Mana tantiyacoj runataga ama gotuparaychu.
8 Yachaj runataga yachashanmi tantiyachin imano goyaycashantapis.
9 Mana tantiyacojcunaga llutanta rurarcurpis manami pengacunchu.
10 Runa llaquicuycashantaga pipis manami musyanchu.
11 Fiyu runacunapaga ima-ayca charashallanpis ushacangami.
12 Runataga purishancuna alli-niräpunmi.
13 Asirpis waquenga llaquishallami caycan.
14 Mana tantiyacojcunaga imanöpis rurashanpita pägunta chasquenga.
15 Mana tantiyacojcunaga imatapis wiyashanta llapantami riguicurcun.
16 Yachaj tantiyaj runaga ima mana allimanpis chayayta manchacurmi witicun.
17 Imallapitapis rabyaj runacunaga mana yarpachacuypami imatapis ruran.
18 Mana tantiyacojcunaga imaypis upa cayllanchömi carcaycanga.
19 Fiyucunaga alli runacunapa maquintapis muchangarämi.
20 Rïcucunapaga pï-maypis amïgullanmi.
21 Runa-masinta manacajman churarga juchayojmi ricacun.
22 Llutanta rurayta yarpajcunaga pantaycanmi.
23 Arucur ruracorga imallatapis tarinmi.
24 Yachajcunapaga yachashanmi corönanno caycan.
25 Rasun cajta rimaj testïgoga runa-masin wañunanpaj caycaptinpis salbanmi.
26 Tayta Diosta manchacöga Paymanmi yäracun.
27 Tayta Diosta rispitar manchacöga alli cawaytami tarin.
28 Aypallata ray mandaptenga llapanpis allimi rican.
29 Jinan öra mana rabyaj runaga alli yarpayniyojmi.
30 Shacya alli shongu runaga sänumi cawan.
31 Pobricunata ñacachejcunaga camaj Tayta Diostami rabyachin.
32 Fiyu runataga quiquin rurashallanmi mana alliman chayachin.
33 Sumaj alli yachayga caycan alli tantiyajpa umanchömi.
34 Nasyunta mandaj runa Tayta Diosta rispitar mandaptenga runacuna cushishami cawan.
35 Yarpaysapa uywaytaga ray amatarmi cuyan.