1 Alli shimillanpa cuticherga rabyaycajtapis allchacächinmi.
2 Yachajcuna parlajta wiyarga allimi yachacun.
3 Tayta Diosga may-chaychöpis caycanmi.
4 Alli shimillanpa parlajcunaga alli allpacho caycaj yöranömi.
5 Mana tantiyacojcunaga papänin corrijishantapis manami cäsunchu.
6 Mana yatapacoj alli runapa wasinchöga ima-aycanpis puchu-puchumi.
7 Yachajcunaga allita yarpashantami willapäcun.
8 Fiyu runacunapataga imata goptinpis Tayta Dios manami chasquinchu.
9 Fiyu runacuna llutanta rurar goyashantaga Tayta Dios fiyupa melanäcunmi.
10 Allita ruraycashanpita cachaycojcunataga fiyupa castigarmi piñacun.
11 Tayta Diosga ricaycanmi wañojcuna maycho caycashantapis.
12 Mana rispitacojcunaga pï piñacuptinpis manami wiyacunchu.
13 Shongun cushisha captenga cäranpis cushishami.
14 Alli yarpaysapacunaga imatapis yachacuytami munan.
15 Llaquisha goyajcunapäga imay junajpis mana allillami.
16 Pobrilla carpis Tayta Diosllata manchacur rispitaymi mas alliga,
17 Cuyanacur goyashaga yacu calullapis mishquinmi.
18 Mana rabyaj runaga rimanacuytapis chawächinmi.
19 Guellacunapäga caminunpis casha shata juntashami caycan.
20 Yachaj wamraga maman-taytantapis cushicachinmi.
21 Mana tantiyacoj runaga upa cayninwan llutanta rurashanpitapis cushicunmi.
22 Shuntacaycur mana parlacuptenga llapan yarpashancunapis manami camacanchu.
23 Tapucushanta alli cuticherga cushicunmi.
24 Alli cajta rurajcunaga janaj pachamanmi aywaconga.
25 Alli-tucojcuna llapan charashantami Tayta Diosga ushacächin.
26 Mana allita rurayta yarpajcunataga Tayta Dios melanäcunmi.
27 Imatapis yargaypa-yargar munajcunaga famillyanmanmi disigrasyata chayachimonga.
28 Alli runaga imano cutichinanpäpis sumajrämi yarpachacun.
29 Fiyu runacunataga Tayta Dios manami wiyanchu.
30 Alli ñawiwan ricäriptenga jucninpa shongunpis cushicunmi.
31 Alli cawananpaj willapashanta wiyacojcunaga
32 Corrijishancunata mana wiyacöga quiquillanmi mana alliman chayan.
33 Tayta Diosta manchapacur rispitarga yachaj caymanmi chayanga.