1 Munyaman ayun Apo Dios,
2 Ya ikantaanyu Hiya,
3 Iyamlongyu nan me'gonan an ngadana,
4 Ya hay hapulonyu ya hi Apo Dios ya nan pamaliwna,
5 Nomnomonyu nan umipanoh'a an inatna,
6 da'yun holag Abraham an baalna,
7 Hiyay Apu an Dios tu'u an manumalyah an amin hitun alutaluta,
8 ya nonomnomonah engga'enggana din intulagna an din intulagnah nan hinlibun aholaholag
9 an hiyah ne din intulagnan Abraham,
10 ya inhamadna an inyuldin goh ay Jacob
11 Ya inalinan diday,
12 Ya heden nangalyanan dida ya din a'itang di uyapda an tatagun Apo Dios,
13 ya gunda nuntinnolman hinan numbino'ob'on an babluy,
14 Mu agguy inyabulut Apo Dios an waday mangipaligligat ay dida,
15 an inalinay, “Adiyu aton di nappuhih nan pento"un baal'u,
16 Ya bentel Apo Dios nan babluy ad Canaan,
17 Mu waday ohan dida an nangun'unna an immuy ad Egypt
18 Ya imbaludda an binobodday hu'inah kanhel,
19 ta engganay un nipa'annung din nipa'innilan ma'at,
20 At nunhonag nan ali ta immuyna impibo'tan hi Joseph,
21 Ya indatnay haad Joseph ta hiyay nangipapto' hinan palasyu,
22 ta hiyay nummandal hinan u'upihyal,
23 At immuy nan holag Israel an ni'hitud Egypt,
24 Ya nunhologon Apo Dios nan tatagunan holag Israel hidi,
25 Mu inyabulutnay pamoholandah nan tataguna,
26 Mu hennagnah Moses an baalna,
27 ta impattigda nan umipanoh'an impa'at Apo Dios ay didah nan tataguh ad Egypt,
28 At impahelongnad Egypt ta hemmelong an amin nan babluyda,
29 Ya numbalinonah dala nan danum an amin hinan wangwangda,
30 Ya limmuna goh di do'ol an tu'a' ta hino'napandan amin nan babluyda,
31 Ya limmun goh Apo Dios nan do'ol an lalog
32 Ya impa'udana, mu un o"ongol an dalallu nan nun'agah hinan babluyda,
33 At numpa"inan amin nan greyp ya nan ayiwda an figs,
34 Ya himmapit goh, ya nalmuy nidugah an do'ol an dudun ya battat an adi ahan ma'yap,
35 at nun'a'andan amin di tubun nan malgom an himmangaw,
36 At numpatoynan amin din papangpangullun linala'in holag nan hinohhan pamilyan nan i'Egypt.
37 Ya impanguluna nan tataguna ta nakakdad Egypt,
38 Ya nidugah di immamlongan nan i'Egypt hi nakakanda
39 Ya heden nakakanda ya liniduman Apo Dios didah nan ma'ugtul an bunut hidin pundaldallanandah nan mapatal,
40 Ya unat goh numbagadah dotag hi ihdada ya indatnay nidugah an do'ol an bagit,
41 Ya binhina goh nan daplah ta bimmuhu' nan do'ol an danum,
42 ti ninomnomna din me'gonan an ni'tulagana ay Abraham an baalna.
43 At heden nangekakanah nan tataguna ya nidugah di nun'am'amlonganda,
44 At indatnan dida nan lutan di udumnan tatagu
45 Ya manu ay umat hinay na'at ya ta way aton nan tatagunan mangunud hinan Uldina,