1 Madayaw hi Apo Dios!
2 Mi'id ah way abalinanan mangibaag hinan nidugah an umipanoh'a an gun aton nan Dios,
3 Mipa'amlong nan tagun mangunud hinan nahamad an Tuguna
4 Nomnomona' ni', O Apu, hinan gutud di pamadangam hinan tatagum,
5 ta way ato' an mannig hinan pumhodan nan pento'mun tatagum,
6 Umat amih din a'apumi an numbahol goh ti gunmi inat di nun'appuhi,
7 Hidin wadan din o'ommodmih ad Egypt ya agguyda na'awatan di aat nan umipanoh'an ina'inat Apo Dios,
8 Mu ta"on hi un umat hinay aat nan tatagu mu binaliwana damdama dida ti hiyah ne din intulagna,
9 At hiyanan minandalna nan danum hinan Mumbolah an Baybay,
10 At binaliwana didah nan namohol ay dida,
11 Mu din nangubat ay dida ya nun'alnongda an mi'id ah na'angang,
12 at kinulug mahkay nan tataguna din intulagna,
13 Mu un na'amtang ya inaliwanda din inatnan dida,
14 ti hidin wadandah nan mapulun ya do'ol di imbagadah mahapulda ta nampongdan Hiya.
15 At indatnan dida din imbagadan pa'appopohdonda,
16 Ya din wadandah dih nan mapulun ya immamoh nan tatagun da Moses
17 Ya dimmalat hanan aatda ya nanga' nan luta,
18 ya waday nun'a'agah hi apuy an nalpud daya ta nunggohobna din i'ibbada
19 At nun'ammadah bulul an umat hi bakah din wadandah nan Duntug an Sinai
20 At inhukatda nan immannung an Dios hinan bulul an umat hi manilhig an baka an holo' di tanudna.
21 Ya inaliwanda nan Diosda an namaliw ay dida an din nangat hi numbino'ob'on an umipanoh'ah din wadandad Egypt
22 ti do'ol di immipanoh'ah inatnah did Egypt,
23 At inalin Apo Dios di ubahona nan tataguna,
24 Ya pinahiwda din ma"aphod an lutan nidat ay dida ti agguyda kinulug din intulagna ay dida.
25 Ya undaat goh nilu'u' hinan tuldada,
26 At hiyaat un inhapatan Apo Dios an pumpatoyna didah nan mapulun,
27 ya pun'iwa'atnay holagdah nan adadagwin bo'onda babluy,
28 Latot ya binalbaliyanday odoldah nan ni'dayawandan Ba'al an bulul hidid Peor,
29 At impabungotdah Apo Dios hinan nun'appuhin ina'inatda,
30 Mu la'tot ya bimmungot hi Phinehas,
31 At henen maphod an inatnay dimmalat hi nangibilangan Apo Dios ay hiyah nahamad,
32 Ya hidih nan way obob ad Meribah ya impabungot goh din tataguh Apo Dios,
33 At la'tot ya impah'it ahan Moses din ina'inatdan namahiw hinan Na'abuniyanan an Lennawa,
34 Ti agguy inunud nan holag Israel din intugun Apo Dios ay didan
35 Mu undaat goh ni'yappuan ay dida,
36 ya ni'dayawdah nan bululda,
37 Ya ta"on un nan imbaluydan lala'i unu babai ya ene'nongdah nan bulul ad Canaan.
38 Hay pinatoyda ya nan imbabaluydan ung'ungungngan mi'id di baholda ta ene'nongdah nan bulul hidid Canaan,
39 At pimmuhiy aatdan nen nun'appuhin inatda an paddungnay unda immilugtap.
40 Ya bimmungot hi Apo Dios hinan tataguna
41 At impa'abakna didah nan tataguh nan udumnan babluy
42 Ya nuntamuonda dida,
43 Ya gun intugtugan Apo Dios an namaliw ay dida,
44 Mu hemmo' Apo Dios damdama dida ti dengngolna din numpahpahmo'anda,
45 ya ninomnomna din intulagnan dida,
46 At impa'uyanay nomnom nan buhulda ta hom'onda dida.
47 Apo Dios an Diosmi, baliwan ni' da'mi, ta amungon da'min tatagum an nun'iwa'at hinan abablubabluy
48 At dayawon tu'uh Apo Dios an Dios nan holag Israel ad ugwan hi engganah mi'id di pogpogna,