1 Munyaman tu'un Apo Dios ti nahamad di aatna,
2 Da'yun amin an binaliwan Apo Dios di mangat ete ti da'yu nan nabaliwan hinan buhulyu
3 ti inamung da'yun inilpuh nan numbino'ob'on an babluy an nete"ah buhu'an di algaw ta engganah nan alimuhana,
4 Mu din udumna ya unda limmane'le'od hinan mapulun an mi'id di iniladah dalan an miyuy hinan babluy an mabalin hi pi'hituwanda.
5 At hinoltapday hinaangda ya inuwawda,
6 Ya unat goh mid mahkay abalinanda ya nunluwaludan Apo Dios,
7 Ya binadangana dida,
8 At hay maphod hi atonda ya munyamandan Apo Dios hinan nidugah an homo'nan dida,
9 Ti impa'inumana din na'uwaw,
10 Mu din udumna ya wah didah nan hehellong an agogohgoh ti nunholholtapda ya nun'akanhilanda.
11 Ya manu ay immatdahna ti agguyda inunud nan Hapit Apo Dios,
12 At hiyaat unna nunholholtapon didah nan naligat an tamu ya hinan nida'lehanda,
13 Mu unat goh nunluwaludan Apo Dios ya binadangana didah nan nunholholtapanda
14 At enekakna didah nan helong an nihinanda,
15 At maphod hi unda munyaman ay Apo Dios hinan nidugah an pamhodna
16 Ti numpa"ina nan gambang an tangob di baludan,
17 Nan udumnan dida ya nginumhaydan dimmalat nan nappuhin ina'inatda,
18 At la'tot ya adida pohdon an mangan,
19 Ya unat goh immatdah na ya nunluwaludan Apo Dios ta binadangana dida,
20 Ya un anggay din hinapitna ya inyadaogna dida,
21 At maphod hi unda munyaman ay Apo Dios an dumalat nan nidugah an pamhodna
22 Ya mahapul an e'nongda nan Onong an Punyamananda,
23 Ya nan udumnan dida ya nunlugandah nan pupul ti numbaatda,
24 at hidiy nanginnilaandah aat di umipanoh'an abalinan Apo Dios hi inatnah nan maluhung an baybay.
25 Ya minandalna nan tuyup ta bimmi'ah,
26 At gun natu"ug din pupuldah ya gun nagah an niba'nog hinan danum,
27 Ya umatdah nan nun'abutong ti munhinaggawda,
28 At nunluwaludan Apo Dios eden nunholholtapanda,
29 ti impadinongna din puo',
30 At nun'am'amlongdah din dimminngan di puo' ya dalluyun,
31 At maphod hi unda munyaman ay Apo Dios hinan adi malumluman an pamhodna
32 Ya maphod goh hi unda ipa'innilah nan a'amungan di do'ol an tatagu nan nidugah an abalinana,
33 Ya tindu' Apo Dios nan danum hinan wangwang ta na'ammaganan nan luta,
34 ya numbalinona nan lo'eh an luta ta umat hi ahin an pinumhaw,
35 Ya numbalinona nan mapulun hi puhung,
36 ta hidiy nangiyayanah nan tatagun nun'abtel ta nunhitudah di,
37 At binogayanda nan papayawda,
38 Ya nidugah an dimmo'ol di holagda ti winagahan Apo Dios dida,
39 Mu immitang nan holag Israel,
40 Ya impattig Apo Dios di boholnah nan nangipaligligat ay dida,
41 Mu binaliwna nan nun'awotwot hinan punligligatanda,
42 Ya ma'innila an umamlong nan maphod di ugalidah unda tigon di umat hitun ma'at,
43 At maphod hi un nan nun'ala'eng ya nomnomonda hanan na'na'at