1 Joexaxe e'ỹ rei va'e ma ha'e kuery ae oipotaa rami rive ikuai,
2 Hi'arandu e'ỹ va'e ndoikuaaxei 'rã 'arandu,
3 Teko vai oĩ ramo oĩ avi 'rã jojou vaia,
4 Avakue ijayvua ma yy typy va'e ramigua,
5 Nda'evei otekoavy va'ekue nhamboeko porã aguã,
6 Hi'arandu e'ỹ va'e ijayvua ojapo 'rã joguero'a rei aguã rami,
7 Hi'arandu e'ỹ va'e ayvu ma ha'e kuery ae imombaarã rive,
8 Ijayvuxe reia ma he'ẽve va'e rami
9 Inhate'ỹa rupi rive omba'eapo va'e ma
10 Senhor rery ma torre imbaraeteve va'e,
11 Oguerekopa va'e pe rã imba'e rei-rei ma tetã ikorapa va'e rami,
12 Avakue ikuai axy e'ỹa ja ojejou porã rei 'rã opy'a py,
13 Nhaendu kuaa e'ỹ re nhambovai vy
14 Avakue imba'eaxy teĩ ipy'a guaxua omombaraete 'rã,
15 Hi'arandu va'e opy'a re omoĩ 'rã oikuaa porãve aguã,
16 Joupe avakue mba'emo ome'ẽ 'rã tape oipe'a uka vy,
17 Ha'e ranhe ojepy ukaa rupi ijayvu rã ixupe “Ha'evea ramigua” ja'e ranhe 'rã,
18 Nhombovake va'e kuery xortea oexa vy opytu'upa 'rã joupe ijayvu atãa gui,
19 Nhanderegua nhambopoxy rire haxy ete 'rã ha'eve vai ju aguã,
20 Nhandeayvuague rami oiko ramo javy'a 'rã nhanekuraxõ py,
21 Nhandeayvua py jajoapo 'rã omano, e'ỹ vy oikove aguã rami.
22 Nhandera'yxyrã jajou vy mba'emo porã jajou,
23 Iporiaukue'i ma mba'emo re ojerurea rupi 'rã ijayvu,
24 Avakue irũ reta va'e omokanhy tema 'rã imondovy.