1 Nanhamboetei 'rã hi'arandu e'ỹ va'e kuery anhetẽ rupi e'ỹ ijayvu va'e.
2 Jaikuaa porã pota e'ỹ re mba'emo jajapo aguã nda'evei,
3 Nhande ae 'arandu e'ỹa rupi vy jajavy 'rã tape,
4 Oguerekopa rei va'e heta 'rã ojou oirũrã,
5 Joekokue ramigua rive mombe'uare ma nombopagaa e'ỹi 'rã,
6 Mba'emo omboja'o-ja'o va'e oguerovy'a pavẽ 'rã,
7 Iporiaukue'i ma hexegua kuery ae'i voi ndoexaxei 'rã,
8 O'arandurã ojou va'e ma guekove oayvu vy ae,
9 Joekokue ramigua rive mombe'uare ma nombopagaa e'ỹi 'rã,
10 Hi'arandu e'ỹ va'e oguerekopa rei aguã nda'evei,
11 Jajejokoa rupi vy nanhandevai vyvoi 'rã,
12 Huvixa ipoxya ma guary okororõa rami,
13 Ta'y kuery hi'arandu e'ỹ va'e omoxĩmba rei 'rã nguu,
14 Nguu kuery gui avakue ojopy 'rã ngoorã ha'e omba'e rei-reirã,
15 Ate'ỹ gui ae nhanderopeyi riae 'rã,
16 Ojapo uka pyre rami ikuai va'e ma guekove re ae onhangareko va'e,
17 Iporiaukue'i mboaxya ma Senhor pe ae oiporuka va'e,
18 Ha'eve teri reve emo'arandu ke ndera'y,
19 Ivai ja topaga ipoxy reiague re,
20 Nemongetaa rã ejapyxaka porã ke, endu pota nembo'ea rã,
21 Avakue ma opa mba'e re onhembopy'a teĩ,
22 Nhanhomboaxya rupi nhandekuai ramo nhandererovy'aa 'rã,
23 Senhor renonde jajererokyjea rupi vy jaupity 'rã tekove.
24 Inhate'ỹ va'e ma hy'a py opo'ẽ teĩ
25 Jojojai rei va'ekue nhambopaga ramo hi'arandu e'ỹ va'ekue oexa vy oiko kuaa pota nho 'rã okuapy,
26 Ta'y nguu ojavyky rei, ha'e oxy omoxẽ rire ma
27 Xera'y, nembo'ea nerendu potai ri vy
28 Heko vai va'e joekokue omombe'ua py ombojaru rei 'rã imboayvua,
29 Jojojai rei va'ekue ma ombopagaa aguã rami ae ikuai,