1 Gamu dad ngà, flinge gamu i fngewe màyu gamu,
2 Nangyu nlifet i tdògu gamu,
3 Alògu satu tingà i màgu di satu yaanan, na di tukay agu fa,
4 màgu tamdò deg, na galan man di deg manan,
5 Too ge mngabal kfulung na kaglabat,
6 Toom fkah di nawam i kfulung du én kamlung ge,
7 Too ge mngabal i kfulung, du ani mabtas di kdee,
8 Ku knabasam i kfulung mbaling ge mdatah,
9 Na too ge dnilè i dad to ge i to nunkfulung.”
10 Tingàgu, flinge ge di deg na dnawatam i mangu di ge,
11 Tagatdògu di ge i kfulung,
12 Na di kagum landè gablabal di dalanam,
13 Galam fandam i tdògu di ge, busekam di nawam,
14 Na nang ge salu di gal gusalu i dad to sasè,
15 Fawag ge di sasè dalanla, nang ge magu déén,
16 Silang gkudang dad to sasè ku gamgimò ale sasè,
17 I sasè nimò i dad to labè,
18 I dalan i dad to matlu gambet i ksut i duh,
19 Kabay i dalan i dad to sasè mahal, du too kmifu,
20 Ngàgu, toom fandam i gmangu di ge,
21 Toom busek ani di fandamam,
22 I dad to too gamlabat i gmangu ani fye lawehla,
23 Toom neye ku tan fandam i nawam,
24 Nang ge tmulen kéng,
25 Tatì ge fatlu magu di matlu dalan,
26 Funam fandam i kdee nimoam,
27 Fawag ge di sasè, na fadlug ge magu di matlu dalan,