1 Yawe uŋun kɨla amɨn madep egɨsak. Mɨktɨm gak kɨsɨk kɨsɨk aki.
2 Gɨkwem gat ae pɨlɨn gat da aŋgwasamal.
3 Kɨndap da mibɨl taŋ ɨmɨŋek uwalni aŋgwasɨŋek ekwaŋ uŋun soŋban pasɨlgaŋ.
4 Uŋun da malni yopban mɨktɨm teŋteŋosok.
5 Yawe apban kaŋek kabap da pakbi dagoŋ.
6 Kundu da aŋpakni kɨlegɨ do yaŋ teŋteŋok aŋakwan mɨŋat amɨn morapyo da tɨlɨmni koŋ.
7 Amɨn kokup kɨdat gawak yomɨŋek paŋkɨsaŋ uŋun mayak tok paŋ.
8 Saion kokup pap amɨn gat, ae Juda mɨktɨmon kokup pap taŋ aŋaŋ kwaŋ uŋun dakon amɨn gat da uŋun nandaŋek, gen kokwin tagɨsi asal uŋun do but galak nandaŋek kɨsɨk kɨsɨk aŋ.
9 Nido Yawe gak Piŋkop Wɨkwisi egek mɨktɨm morap kɨsi kɨla asal.
10 Ji Yawe but dasi galak taŋ ɨmaŋ amɨn, ji aŋpak yokwi do nandaba ɨŋanisi asak.
11 Piŋkop da amɨn kɨlegɨ teŋteŋaŋ yoban kɨsɨk kɨsɨk paŋ.
12 Amɨn kɨlegɨ, ji Yawe kɨsɨk kɨsɨk aŋɨmɨŋek mani telagɨ do nandaŋek ya yaŋ iyɨni.