1 Kana ña tnoꞌo ndichi,
2 Junkuiin ndee sukun xtuu yuku
3 te kana yatni yeꞌe nuu ndiukuei ñayiu ñuu,
4 “Nuu maa ron ja ka kuu ron teyii, kana rin,
5 Roon ja tu ka jini ron naxa vi saꞌa ron,
6 Vi konini, chi kaꞌan rin tnoꞌo kanuu ndevaꞌa,
7 Te tnoꞌo kaꞌan rin yaꞌa kuu tnoꞌo ndaa,
8 Chi ndiꞌi tnoꞌo ja kaꞌan rin kuu tnoꞌo ndaa,
9 Chi ndiꞌi kuu tnoꞌo ndaa nuu ñayiu jinkuiꞌnu ini,
10 Vi kuantaꞌu tnoꞌo kaxtnoꞌo rin nuu tniuu ja vi kuantaꞌu ron plata,
11 Chi ja guaꞌa ndevaꞌa ka kuu tnoꞌo ndichi saa yuu vii,
12 “Maa rin kuu tnoꞌo ndichi, te in ni ka oo rin jin tnoꞌo niꞌnu ini,
13 Te ja yuꞌu niꞌnuo Jitoꞌo kuu ja skexiko jakueꞌe,
14 Kuenta maa rin kuu tnoꞌo xteku ña, vi tnoꞌo niꞌnu guaꞌa ini.
15 Te ndee jañuꞌu ka maa rin, te ka tatnuni tee ka kuu rey,
16 Te suni ndee jañuꞌu ka maa rin, te ka oo tee ka netniuu,
17 Te kutoo rin na in kutoo ña jin rin,
18 Nuu maa rin ka oo jakuika vi jayiñuꞌu,
19 Te jaguaꞌa ka kuu ja jiñaꞌa ruꞌun, masu oro ninoꞌo,
20 Jika rin nuu ichi ndaa,
21 nagua ja saꞌa kuika rin ñayiu ka kutoo ña,
22 ’Maa Jitoꞌo ni saꞌa ña jin rin ndee jaxtnañuꞌu,
23 Te ni saꞌa ña ya ndee jaxtnañuꞌu ja oo rin nikuii nikani,
24 Ama ka ja vi jinkoo ndute mar, vi ja vi taꞌu kuaꞌa nuu ndute,
25 Ja oo rin ama ka ja vi jinkoo yuku,
26 ama ka ja saꞌa ya ñuꞌu vi ja oo nui,
27 Te nuu ni saꞌa ya andivi vi nuu ni saꞌa siin ya ñuꞌu jin nuu ndute mar,
28 Te nuu ni saꞌa ya viko ja oo andivi
29 Te nuu ni tatnuni ya nuu ndute ja ma kee de kiꞌin de,
30 te yun oo rin jin ya, kaꞌan rin ja oo guaꞌa tniuu saꞌa ya,
31 Te kusii ini rin ja jiondita rin nuu ñuyiu ni saꞌa ya,
32 ’Vitna, vi seꞌe, te vi konini,
33 Vi konini tnoꞌo kaxtnoꞌo rin,
34 Chi na taꞌu na ndetu ñayiu nini tnoꞌo kaꞌan rin,
35 Chi na in nukuꞌun ña jin rin, te niꞌi ja kotekui,
36 Su na in skexiko ña jin rin, te saꞌa kueꞌi mai,