1 Šenni henna ga bine yaynandi,
2 Lakkalkoyney deeney ga kate boro ma baa bayray,
3 Abadantaa moɲey goo nongoo kul ga,
4 Deene henna šenni manʼti kala tuuri kaŋ ga hunayan noo,
5 Saama mma nga baaba hoyraa kaynandi,
6 Alman beeri goo boro šerrante hugoo ra,
7 Lakkalkoyney miɲey mma bayray fee,
8 Abadantaa ga konna boro futawey sargaroo,
9 Abadantaa ga konna boro futu fondaa,
10 Boro kaŋ na fondaa naŋ, goojiyan cimi gʼa batu.
11 Alaahara nda halaciyan goo Abadantaa jine,
12 Ɲooɲokaw si baa i ma nga daŋ fondaa ra,
13 Bine kaŋ ga ɲaali ga ndum boryandi,
14 Bine lakkalkoyni ga bayray ceeci,
15 Talka zaarey kul si boori,
16 Duuray kayna nda Abadantaa hunburaa
17 Boro ma hubay ŋaa nongu kaŋ ra baji goo
18 Boro bine konna ga citi tunandi,
19 Fuyyante fondaa ga hima nda kali kaŋ teendi nda karji,
20 Izʼaru lakkalkoyni ga baaboo binoo ɲaalandi,
21 Saamataray ti ɲaali lakkal jaŋante se,
22 Goyey si boori nda borey si goro ka šelaŋ,
23 Adamize ga ɲaali nda a na zaabi henna noo,
24 Lakkalkoyni si hanga kala hunayan fondaa kaŋ ga koy beene,
25 Abadantaa ga hundi beerey hugey kayri,
26 Abadantaa ga konna miile futay,
27 Boro kaŋ ga baa alman futu ga kate nga hugoo ga bone,
28 Boro šerrante mma miile ka zaabi,
29 Abadantaa ga mooru boro futu,
30 Ndum annuurante ga bine ɲaalandi,
31 Haŋa kaŋ ga maa hoyray se kaŋ ga hunayan noo,
32 Boro kaŋ si hoyray daŋ assal mma nga boŋ kaynandi,
33 Abadantaa hunburaa ga boro cawandi lakkal.