1 Main God, ola nogud pipul bin teikoba yu kantri.
2 Deibin libum ola ded bodi blanga yu pipul olabat blanga ola bard blanga dagadagatbat,
3 Deibin meigim yu pipul olabat lujim blad wulijim woda.
4 Pipul langa najalot kantri hu nomo weship God toktok nogudwei blanga melabat.
5 YAWEI, haulong yu garra wail langa melabat?
6 God, yu garra gitwail langa detlot pipul brom najalot kantri hu nomo weship yu,
7 Dumaji olabat na bin kilim ola pipul blanga yu,
8 Nomo panishim melabat blanga ola nogudbala ting weya melabat femilimob bin oldei dumbat longtaim.
9 Album melabat God.
10 Wotfo detlot pipul brom najalot kantri askim melabat, “Weya yumob God?”
11 God yu garra irrim detlot prisanamob kraikraibat,
12 Detlot pipul weya deibin toktokbat nogudwei langa yu YAWEI,
13 En langa det taim na melabat garra gibitbat yu theingks olagijawan en preisimbat yu olataim.