1 Yachayga willacoj warminömi gayacuyparaj willacuycan.
2 Puytush lömaman ichiycur,
3 Marcaman yaycuna puncucunacho gayacuycan:
4 «Runacuna, canan parlamushäga
5 Tantiyacuyta mana munaj mösucuna,
6 Wiyamay-llapa.
7 Rasun cajllatami yachachishayqui
8 Rasun cajllatami rimä.
9 Yachachishäga fäsi yachacuymi yarpaysapacunapäwan tantiyacojcunapäga.
10 Guellayta gorita ashinayquipa ruquenga
11 Yachaymanga manami tincunchu cuyayllapaj perlas rumipis.
12 «Noga yachayga juc runanömi cä.
13 Tayta Diosta rispitaj runaga mana alli cajcunata llapantami chiquin.
14 Nogami yarpächë imapäpis; imata rurananpäpis camacächë.
15 Nogapitami raycunapis munaynincho runacunata chararan.
16 Nogapitami llapan mayur mandajcunapis chaychica runata mandan.
17 Cuyamajcunata nogaga cuyämi.
18 Nogami camacächë rispitasha cananpaj, ima-aycayojpis cananpaj.
19 Noga tarichishäga allinnin goripitapis mas allimi.
20 Nogaga llapantapis alli cajllatami camacächë.
21 Cuyar yachacamajcunataga ima-aycatapis tarichëmi.
22 «Tayta Diosga gallaycunallanchönami nogata ruramaran.
23 Imapis manaraj captin gallarinanchömi ruramaran.
24 May-may lamarcunapis manaraj captillannami ruramaran.
25 Puntacunawan jircacunapis manaraj captinmi
26 Chay öraga chaqui jircacunapis, ni allpapis manami caranrächu.
27 Janaj pachaman yacuta raquiptin,
28 Syëluman pucutayta camacächiptin,
29 Allpa jananman mana llojshimunanpaj lamar yacuta camacächiptin,
30 paychömi nogaga caycarä nishanta rurar.
31 Tayta Dios camashan pachacho fiyupa cushishami caycashcä.
32 «Wamräcuna, canan willapashätaga sumaj wiyacuy.
33 Yachachishäcunata sumaj wiyacuy.
34 Yachachishäta wiyacoj runaga fiyupa cushishami canga.
35 Nogata tarimaj cäga imaycamapis cushishami cawanga.
36 Nogata mana yarpämajcunami ichanga quiquillan mana allita ruracuycan.