1 Salomón yachaj car rimashan rimaycuna:
2 Mana allicunata ruraypa rïcuyashanga manami dürangachu.
3 Alli runacunataga Tayta Dios manami muchupacächinchu.
4 Mana arucojcunaga imaypis muchupacayllachömi.
5 Alli tantiyacoj runacunaga usya wichanmi micuyninta shuntapacun.
6 Alli runapäga bindisyun manami pishinchu.
7 Alli runataga alli cashanpita fiyupami yarparan.
8 Yachaj runacunaga willapashancunata llapantami tantiyacun.
9 Pipis mana rimasha limyu runaga cushishami goyäcun.
10 Mana allita rurananpaj guepishtapayllapa sëñata rurajcunaga fiyupa llaquicuytami chayachimun.
11 Alli runacuna willapämashanchëga chuya yacunömi limyu caycan.
12 Chiquinacuyga pitapis pillyachinmi.
13 Yachajcuna parlashanchöga fiyupa yachaycunallatami wiyanchi.
14 Yachaj runaga alli cajllatami parlan.
15 Rïcu runataga ima-aycanpis cashanpitami rispitan.
16 Alli runapaga allita rurashanpitami alli caway pägun.
17 Corrijishanta wiyacur chasquicojcunaga alli cawaytami tarin.
18 Llulla carmi chiqui cashanta mana musyacächinchu.
19 Achcata rimajcunaga llutantapis rimanmi.
20 Yachaj runa parlashanga guellaynömi bälin.
21 Alli runacuna willapashanga achcajtami alli goyayta tarichin.
22 Tayta Diospa bindisyunninwanmi alli cawan.
23 Mana tantiyacoj upacunaga juchata rurar cushicunmi.
24 Fiyucunataga manchacushan cajrämi chayanga.
25 Löcu wayra imatapis apacushannömi fiyu runaga illgan.
26 Cachacojpäga guella runa caycan pochgoj yacu quiruta shimpachishannömi.
27 Tayta Diosta rispitar manchacojcunaga unaycamami cawanga.
28 Alli runataga ima rurashanpis allimi llojshipanga.
29 Alli runacunataga imapitapis Tayta Diosmi chapan.
30 Alli runataga manami imapis päsangachu.
31 Alli runapitaga alli yachachicuycunatami wiyacunchi.
32 Alli runaga maysi wiyaparäcuyllami parlan.