1 «Chaymi Job, cananga imata nishäcunatapis sumaj wiyamay.
2 Gamta cutichinäpäga shimi puncullächönami caycan.
3 Rasun cajtami parlamushaj.
4 Chayno canäpämi munayniyoj Tayta Dios ruramasha.
5 Puydishpayquega nishäta mä cutichimanqui.
6 Gampis nogapis Diospa ñaupanchöga iwalmi caycanchi.
7 Chayno caycaptëga ama manchacamaychu.
8 «Gamga manacajcunatami rimashcanqui.
9 ‹Nogaga juchaynaj limyu runami cä.
10 Diosga mayacachaycanmi imapita castigamänanpäpis.
11 Chaquëcunapitapis cadinawanmi watarcamasha.
12 «Gam chayno rimashayquega manami rasunpachu.
13 ¿Imanirtaj Tayta Dioswan churacayta munanqui?
14 Diosga tucuynöpami willapämanchi.
15 Aybësiga willapämanchi suyñuyninchïcho cämacho puñucasha caycashanchi öra.
16 Diosga runacunapa rinrillanchömi willapan.
17 Chaynöga ruran mana allita ruraycashanta cachaycunanpaj,
18 Chaynöpami timpullancho caycällar wañunanpita salban.
19 Aybësi Diosga runacunata piñacun gueshyacunawan gueshyachir,
20 Chauraga mas allinnin mishquej micuycunapis
21 Gueshyaptin aychancunapis ismur shicwan.
22 Quiquinpis sepultüramanna watgaraycan;
23 «Ichanga chay runapa ñaupancho juc anjil caycashpan,
24 chay anjil cuyapashpan
25 chay runaga gueshyaycashanpita allchacangami.
26 Chauraga mañacuptin Tayta Diospis yanapangami.
27 Chayrämi runa nenga:
28 Chaypa ruquenga wañunäpitami salbamasha.
29 «Diosga chaynömi runata yaparir-yaparir ruran.
30 Wañunanpita salban.
31 Wiyamashpayqui sumaj tantiyacuy ari Job.
32 Cutichimayta munashpayquega rimamuy ari.
33 Imapis cutichimänayquipaj mana captenga upällalla wiyamay.