1 Omuutu afugiirira ohumuŋa amagesi aba genda ohumanya
2 Omuutu omulaŋi asuna obuhoda ohuŋwa eyiri Musengwa
3 Ohuba omuhosi wʼebibi sihireeta obuhuumi hu bulamu wʼomuutu
4 Omuhasi omwegenderesa agima abaatu baŋa wamwe eŋono
5 Etegeha jʼabaatu abagwalaafu jiba jʼamazima
6 Endoma yʼabahosi bʼebibi yahujuha mafugi
7 Abahosi bʼebibi basihiiriha bosibosi
8 Singa oba mugesi, abaatu baja huhusiima
9 Hiraŋi abaatu ohuhunyooma ne waholerera obulamu wuwo ohuhira olu weranga ohuba omwegingihiriri
10 Abaatu abalaŋi balabirira ebyayo byawe
11 Omuutu ahola emirimo nʼamaani asuna emere nyingi
12 Abahosi bʼebibi baŋemba hu huhola bibi
13 Obudulingi wʼababi wubaŋambirayo abeene
14 Omuutu asuna omuhemba ohwema hubi aloma nʼebi ahola
15 Omuŋubeebe aŋeega mbo ati hiisi ehi ahola hiraŋi
16 Omuŋubeebe saalwa hulaga busungu wuwe
17 Omujulizi owʼamazima aŋa obujulizi obutuufu
18 Ebibono abaatu abaŋubeebe ebi beromboja bifumita bugali hyʼepiima
19 Amazima sigaŋwaŋo emirembe nʼemirembe
20 Abahosi bʼebibi bejuuye budulingi mu myoyo
21 Eŋuma habi ahoola hu mugwalaafu
22 Musengwa acaawira erala abaloma ebyʼobudulingi
23 Omuutu omutegeefu sigehenamo ebi amanyire
24 Ohuhola nʼamaani hihuleetera ohuŋuga
25 Omwoyo omuti guhuhenaho esangaalo
26 Omuutu omugwalaafu aluŋamya meriiwe
27 Sosuna ehi wenda onaba nʼoli mudoto
28 Engira yʼomugwalaafu yimuleetera ohuba nʼobulamu