1 Gai a Job ne duudagi de tala ana muna, ga hai ange,
2 “Mee naa au gi ahe ange gi noho i denga malama gu hulo laa,
3 gai dana laama e hagamaalama honga dogu biho,
4 ogu laangi goi mmahi ai,
5 go de masavaa a de Ia Mmahi Mmao laa e noho ai madali au,
6 gai dogu haiava nogo seesee ai e honu i vai uu haduhadu,
7 De masavaa oogu ne hano ai gi gaogao de haitoga o de aduhale,
8 gai denga dama daane ne ngaalue gee i dogu haiava i delaadeu gidee au,
9 Dagi o de henua gu dee pasa,
10 de gau aamua gu dee mmuu,
11 Be goai gu langona agu muna e tuhi ai au,
12 go hiidinga au ne bale ange tangada hagaau aloha e dangi laa,
13 Gilaadeu gu hai ngadaa laa e hagamanuuia ngau,
14 Au e gahu au i de heohi, bei dagodo o de malo;
15 Go au luu mada o tangada dee gide,
16 Au se damana niiolaadeu e duasala,
17 Au ne hebagi ange ga hagadee kii tangada baubau,
18 Gai au ne maanadu i ogu lodo,
19 Au e bei de manu somo e hulo laa ono aga gi lodo vai,
20 Dogu mahamaha e dagodo naa donu huu i ogu daha,
21 Dangada e tali e hagallongo agu hagasaele;
22 Dua de tala agu muna, gai gilaadeu tee ahe ange e pasa,
23 Gilaadeu ne tali e hagallongo agu muna, bei delaadeu tali gi pala de langi,
24 De masavaa ne gada ange ai dogu ngudu gi gilaadeu, gai gilaadeu tee hagadonusia donu,
25 Go au ne hilihilia ange alaadeu mee e hai, go au delaadeu dagi.