1 Chicahuac nijtzajtzilía Toteco Dios para ma nechpalehui.
2 Quema nechajsic miyac tlaijiyohuilistli nimantzi nijtemo noTeco.
3 Nimoyolilhuía tlen Toteco Dios huan niyolpitzahuía huan nichoca.
4 Toteco, ta ax tinechcahuili ma nicochis.
5 Ajachica nimoyolilhuía tlen nopa yejyectzi tonali huan nopa xihuitl tlen panoque huejcajquiya.
6 Niquilnamiqui nopa miyac yohuali quema nihuicayaya ica paquilistli.
7 ¿Huelis Toteco nechtlahuelcajtoc para nochipa?
8 ¿Huelis ya tlanqui iteicnelilis ica na?
9 ¿Huelis Toteco Dios ya quiilcajqui para monequi nechchihuilis tlen cuali na tlen niitztoc ipan cuesoli?
10 Huan ipan nohueyi cuesol nimoilhui:
11 Más cuali niquilnamiquis nochi nopa huejhueyi tiochicahualnescayotl tlen TOTECO nechchihuili huejcajquiya.”
12 Quena, mojmostla nimoilhuis tlen nopa huejhueyi tlamantli para nochipa.
13 ¡NoTeco Dios, nelía tlatzejtzeloltic nochi moojhui!
14 ¡Ta tiDios tlen tijchihua huejhueyi chicahualnescayotl huan miyac tlamantli tlen tlacame quisentlachilíaj!
15 Ica mohueyi chicahualis titechmanahui,
16 Toteco Dios, nopa hueyi atl tlen itoca Chichiltic momajmati quema mitzitac.
17 Nopa mixtli quichijqui ma tlaahuetzi chicahuac.
18 Caquistic tlatomonilotl ipan nopa hueyi ajcomalacatl.
19 Tijchijqui se ojtli quema tiquixcotonqui nopa hueyi atl,
20 Huan ipan ni ojtli tiquinyacanqui motlacajhua queja eltosquíaj pilborregojtzitzi ininmaco Moisés huan Aarón.