1 Ni yawu yina, ntima ya munu ke na kutekita,
2 Beno kuwa, beno kuwa kuningana ya ndinga ya yandi,
3 Yandi ke mwangisaka yawu na mazulu nyonso,
4 Mpe kidumu ke wakanaka, bunene ya yandi ke zabakanaka na ndinga ya yandi,
5 Na ndinga ya yandi ya lulendo, Nzambi ke salaka mambu ya ngitukulu,
6 Yandi ke tubaka na neze mutindu yayi: Kubwa na ntoto!
7 Nzambi ke kangaka bisalu ya bantu nyonso,
8 Kibulu ya mfinda ke kwendaka bumbama na kati ya ntadi,
9 Kitembo ya ngolo ke katukaka na sude,
10 Na kiwumunu ya Nzambi maza ya ditadi ke yilamaka,
11 Yandi ke tulaka mupepe ya madidi na kati ya matuti,
12 Ni yandi ke zungisaka yawu na balweka nyonso,
13 Nzambi ke fidisaka matuti samu na kusemba bantu awa na ntoto,
14 Yobi fungula makutu, kuwa mambu yayi!
15 Nge zaba wapi mutindu Nzambi ke twadisilaka yawu?
16 Nge zaba wapi mutindu matuti ke salaka samu ti yawu kubwa ve?
17 Nge yina binkuti kele tiya,
18 nge lenda sala mutindu yandi na kuyalumuna muludi ya mazulu,
19 Zabisa beto yinki beto fwana kutuba na yandi,
20 Kana mu zola kuzonza, ba fwana kuzabisa ntete yandi?
21 Na mpamukunu, ba ke na kutala dyaka ve nsemo yina matuti me bumba,
22 nsemo me katuka na node,
23 Beto zaba ve wapi mutindu beto ke kuma tii na sika ya Nzambi-Mpungu.
24 Ni yawu yina bantu fwana kuzitisa yandi.