1 Ma ko au dela e iloo di hai o di hagaduadua mai baahi o God.
2 Mee guu hono au gi lodo di bouli dongoeho,
3 gu hagamamaawa au hagalee manawa dumaalia.
4 Mee guu huge ogu goneiga, gu oho ogu iwi.
5 Mee guu nnoo au gi lodo di haingadaa mo di haga mmaemmae.
6 Mee guu hono au gii noho i lodo di gowaa bouli dongoeho o di made.
7 Mee guu nnoo au gi nia daula baalanga.
8 Au gu dangidangi loo gi nua i di hagamaamaa,
9 Au e hagadubedube i dogu heehee,
10 Mee gu talitali au gadoo be di ‘bear’,
11 Mee gu hagabagi au gi daha mo hongo di ala,
12 Mee gu taiaga dana maalei,
13 Mee guu puu dana amu gu ulu gi lodo dogu huaidina.
14 Nia daangada gu gadagada mai gi di au i lodo di laangi hagatau.
15 Di haangai huaidu, mo di haga inu di hagammaemmae guu hai mai gi di au.
16 Mee guu hono ogu golomada gi hongo di gelegele,
17 Au gu de langahia eau di mahi o dogu huaidina,
18 Dogu mouli gu haga bodobodo mai,
19 Di hagamamaanadu dogu mmae, dogu ongeonge guu hai di mee e mmala.
20 Au e hagamamaanadu beenei, gei e daadaamee ginai dogu hagataalunga.
21 Gei dogu hagadagadagagee gu gila mai i dogu langahia eau di mee deenei:
22 Di aloho Dimaadua mo dono manawa dumaalia hagalee noho loo.
23 E haga manawa lamalia au gadoo be di haga manawa lamalia o di luada,
24 Dimaadua modogoia ni aagu, deelaa laa Mee go dogu hagadagadagagee.
25 Dimaadua e humalia huoloo gi digau huogodoo ala e hagadonu a Mee.
26 Mai i Mee e humalia, gidaadou huogodoo gi talitali mo di hagakono gi dono hagamouli gidaadou.
27 E humalia maa gidaadou e kabe tadau noho hagalongo i tadau lligi.
28 Maa gidaadou gu manawa gee,
29 Gidaadou gii pala gi lala i lodo tadau manawa hila gi lala,
30 Ma e aha maa gidaadou gu dadaaligi gu lauwa,
31 Di Tagi e manawa dumaalia,
32 Maa Mee ga gaamai di manawa gee,
33 Mee hagalee tenetene gi dono gaamai gi gidaadou di manawa gee mo di mmae.
34 Di Tagi e modongoohia e Ia di madagoaa tadau hagataalunga ala e manawa gee i lodo di hale galabudi.
35 Mee e iloo di madagoaa gidaadou hagalee hai mee gi di tonu o Maa ne gaamai gi gidaadou.
36 Gei Mee e iloo Ia di madagoaa di tonu gu hai gee i lodo di gowaa hai gabunga.
37 Di manawa o Tagi le e gila i nia madagoaa huogodoo.
38 Nia mee humalia mo huaidu e gila aga i di gowaa a Mee gu haganoho.
39 Gidaadou e leelee logo eiaha i di madagoaa gidaadou ga hagaduadua i tadau huaidu?
40 Gidaadou gii mmada gi tadau huaidu, gaa huli labelaa gi Dimaadua.
41 Gidaadou gii huge tadau lodo ang gi God i di langi, ga dalodalo gi Mee boloo,
42 “Meenei Dimaadua, gimaadou gu ihala,
43 “Goe gu daudali mai gimaadou mo di dadaaligi gimaadou.
44 guu ngala i lala di gololangi maadolu,
45 Goe guu hai gimaadou be di gowaa dugu geinga o henuailala.
46 “Gimaadou guu hai haga huaidu go madau hagadaumee.
47 Gimaadou guu noho i lodo di haingadaa mo di hagaloale,
48 Nia dangi o ogu golomada guu hali gi lala,
49 “Nia wai o ogu golomada gaa hali gi lala, hagalee noho,
50 gaa dae loo gi Dimaadua ga helekai mai i di langi,
51 Nia mee ala e mmada ginai au gu haga manawa gee au,
52 “Ogu hagadaumee e helehele au gadoo be di manu,
53 Digaula guu hudu au mouli gi lodo di luwa mo di tai di ngudu di luwa deelaa gi di hadu.
54 Nia wai gu hoohoo aga gi dogu libogo, gei au gu hagamaanadu bolo au gu hoohoo gaa made.
55 “Au gu gahigahi Goe, meenei Dimaadua, mai i lodo di luwa deelaa iei au no lodo.
56 Goe gu hagalongo gi dagu dangidangi bolo gi hudee taidia o dalinga i dagu dangidangi.
57 Goe gu helekai mai i di madagoaa au nogo gahigahi Goe,
58 “Meenei dogu Dagi, Goe gu haga dagaloaha au, gu hagamouli au.
59 Gabunga ina gi di tonu, idimaa Goe gu gidee Goe nia hai ala nogo hai mai gi di au, meenei Dimaadua.
60 Goe gu iloo Goe di hai o ogu hagadaumee ala e hudi wou mai gi di au, e hai baahi mai gi di au.
61 “Meenei Dimaadua goe gu longono e Goe di nadau haganneennee au, gu iloo nadau hai huaidu.
62 Di laangi hagatau, gei ogu hagadaumee e haganohonoho mai nadau huaidu.
63 Digaula e gadagada mai gi di au mai luada gaa dae gi di boo.
64 “Meenei Dimaadua, hagaduadua ina digaula gi nadau haihai huaidu.
65 Haga huaidu ina digaula, mo di haga honu ina digaula gi nia hagabaubau e logo!
66 Gumudia digaula, mo di haga mmaa ina digaula gi daha mo henuailala.”