1 “Di madangi maaloo e hai dogu manawa gi haluihalulu loo gi nua.
2 Goodou huogodoo, hagalongo gi di lee o God,
3 Mee e hagau dana ila gii daba i lala di langi
4 Di ngoloolo o dono lee la gu longono,
5 Nia hagadilinga mee haga goboina ga kila aga
6 Mee gaa hai nia ‘snow’ gii too gi henuailala,
7 e dugu ai nia moomee nia daangada,
8 Nia manu lodo geinga gaa hula gi nadau gowaa e noho ai.
9 Di madangi maaloo le e hanimoi i ngaaga,
10 Nia madangi mai i lodo di ngudu o God
11 Di ila e dabadaba mai i lodo nia gololangi,
12 ala e hagamaanege mai i di hiihai a God.
13 God e hagadoo ia dana uwa gi henuailala,
14 “Noho deemuu, hagalongo Job,
15 Goe e iloo be dehee di hai a God e helekai hua
16 Goe e iloo be dehee di hai o nia gololangi ala e deheedehee i di langi,
17 Gei deeai, dela hua go koe dela e hagaduadua gi di welengina
18 E hai behee?
19 Aago ina gimaadou gi nia helekai e helekai ang gi God;
20 Au hagalee e dangi anga gi God gi dugua mai e helekai gi Mee.
21 “Deenei laa, di maalama o di langi gu madamada,
22 Di madamada e gila aga i baahi la ngaaga,
23 Di mogobuna o God la koia e maaloo dangihi,
24 Deelaa ga hidi mai nia daangada huogodoo gu mmaadagu i Mee,