1 Mokwita goli Yaubada imitukwaibwaili mina Isireli,
2 Mitaga ka - yeigu ulo ninayuwa wala makateki bivakapusiaigu,
3 paila tutala agisi tomitugaga eibanaisi si guguwa saina bidubadu,
4 Matausina gala ibudobodasi mmayuyu,
5 Gala bilumkolaisi mmayuyu makawala tomota ituwoli ilumkolaisi,
6 E mapaila si kamnomwana ivigakaisi kasi katububula, makawala soulava,
7 Mitugaga bidubadu isunapulasi metoya oninasi,
8 Igigilaisi tuwoli tomota, e ililivalasi paila vavagi gaga.
9 Ibigigagaisi Yaubada wa labuma,
10 E ka! - Yaubada la tomota itovilakaisi matausina,
11 Kawasi, “Yaubada gala wala binikoli avaka.
12 Baisa makawala goli si bubunela tomitugaga.
13 E yeigu layamataigu kidamwa nanogu migileu wala.
14 Mwa Yaubada! Lokuyomiyuyaigu yam komwaidona.
15 Kidamwa avai tuta lalilivala makawala baisa,
16 Avigikoni mwada baninamsi uulotoula vavagi makwaina
17 Mitaga oluvi alokaia asuvi om Bwala Kwebumaboma,
18 Yoku bukusaili matausina okabasi saina dumokikina,
19 e otukolela wala biwokuva si momova.
20 E matausina makawala mimi wala eiyam bogwa bitamwau.
21 Avai tuta aninamsi vavagi makwaisina saina yayana,
22 tuta matutona yeigu makawala natana mauna nanagowa.
23 Mitaga tuta komwaidona asisu otalim,
24 Kuvakadaigu metoya om vituloki,
25 Ki, avai vavagi tuvaila isisu wa labuma paila yeigu, mesinaku wala yoku?
26 Kaina nanogu deli wowogu bimama,
27 Matausina availa availa bisilavaimsi mokwita goli bidoumlabasi.
28 Mitaga yeigu, bogwa lalumkoli avai tuta Yaubada deli yeigu, baisa saina bwainigaga!