1 Kala yakaula Guyau.
2 Availa gagabila bikamituli komwaidona vavagi topilaveka bogwa leivagi?
3 Bimwasawasi availa availa matausina ikabikaulasi la karaiwaga duwosisia,
4 E Guyau, kululuwaigu avai tuta bukupilasi m tomota.
5 Kutugwalaigu bagisi si sibwabwaila m tomota,
6 Bogwa kamitugagasi makawala tubumaiasi leivagaisi.
7 Tubumaiasi mapilana Itipita gala ikatetasi avaka Yaubada eivagi kabokatubau.
8 Mitaga bogwa ikoli matausina, makawala bogwa leikatotila,
9 Bogwa eikaraiwogi mapilana Bolita Pilabweyani e imada,
10 Bogwa ikoli la tomota metoya baisa matausina mina kukolosi.
11 Mitaga sopi ivigipulu kasi tilaula.
12 Oluvi la tomota bogwa idubumaisi la biga katotila,
13 Mitaga saina nanakwa ilumwelavaisi avaka bogwa leivagi,
14 Matausina bogwa ikatumati vikeiya oviloupakala,
15 Mapaila isaiki matausina avaka einigadaisi,
16 Baisa oviloupakala matausina ipogaisi Mosese,
17 Oluvi pwaipwaia bogwa ikapogega e ilupoli Datani,
18 Kova bogwa ikapusi baisa kasi tobwakuli,
19 Matausina bogwa eibubulaisi bulumakau goula makwaina Koya Sinai,
20 Bogwa ikatumapwaisi Yaubada Toguyugwayu,
21 Bogwa eilumwelavaisi Yaubada matauna eikatumovi matausina
22 Saina kabokatubau vavagi makwaisina bogwa eivagi mapilana!
23 Avai tuta Yaubada ikaibiga mwada bikatudoum la tomota,
24 Oluvi matausina ipakaisi valu bwaina,
25 Matausina isisuaisi wala olumoulela si buliyoyova e itakulukulusi,
26 Mapaila ikamitilaki matausina
27 deli bivabutu tubusia bilosi oluwalaisi tomota matausina gala inikolaisi Yaubada,
28 Mapilana Piori Yaubada la tomota itokailasi paila Beali kala tapwaroru,
29 Ikatumwalaisi Guyau la gibuluwa metoya baisa avaka eivagaisi,
30 Mitaga Piniasi itokaia imipuki matausina isim kasi pakula,
31 Tomota ikabwailisi Piniasi paila baisa avaka eivagi e leima lagaila,
32 Mapilana outuwotu Meriba tomota iyogibuluwaisi Guyau,
33 Matausina saina iyomiyuyaisi nanola Mosese,
34 Gala ikatumataisi tomota matausina gala inikolaisi Yaubada,
35 mitaga ivaipelasi deli matausina,
36 Ka, Yaubada la tomota itapwarorusi baisa tokolu,
37 Ikasalaisi litusia titoulesi tauwau deli vivila,
38 Bogwa ikatumataisi magudisina gudibubwaila gugwadi,
39 Bogwa eiyogwalaisi titoulesi metoya osi vavagi,
40 Mapaila Guyau igibuluwa baisa la tomota.
41 Matauna isilavi matausina ilosi oyumasi tomota matausina gala inikolaisi Yaubada,
42 Matausina ibodasi kasi lamadada metoya kasi tilaula,
43 Tuta bidubadu Guyau ikoli la tomota,
44 Mitaga Guyau bogwa eilagi matausina avai tuta eidousi,
45 Magila bipilasi matausina e mauula iluluwai la kabutu,
46 Bogwa ivigaki kasi tolamadada komwaidona
47 Mwa! Guyau ma Yaubadasi, kukolaimasi,
48 Kala yakaula Guyau, matauna mina Isireli si Yaubada.