1 “Bitanokagutokisi baisa Guyau, paila matauna tomitakwai.
2 E komwaidomi availa availa Guyau eikatumovi,
3 e leimaiyaimi metoya osi valu togilagala,
4 Mimilisi iwowausi oviloupakala, e gala avai keda ambaisa.
5 Ikamolusi ikadakasi,
6 E oluvi metoya osi tuta mwau idousi baisa Guyau,
7 Ivakadi matausina wa keda duwosisia,
8 Mapaila ibodi binokagutokisi baisa Guyau paila la mitakwai,
9 E Guyau ivimom matausina ikadakasi,
10 Mimilisiga tomota isigagasi odudubila saina dubilikitakita,
11 paila uula eikosomapwaisi Yaubada Topeuligaga la karaiwaga makwaisina,
12 Eisomatasi osi paisewa mwau.
13 E oluvi metoya osi tuta mwau idousi baisa Guyau,
14 Ikatusunupuloi matausina metoya odudubila, saina dubilikitakita,
15 Mapaila ibodi binokagutokisi baisa Guyau paila la mitakwai,
16 Ikodidaimi kala lulu bwala barasiwokuva wala
17 Mimilisiga toninagowa eibodaisi mmayuyu mapula si sula,
18 Igisaisi kaula iminineiki ninasi
19 E oluvi metoya osi tuta mwau idousi baisa Guyau,
20 Iyomovi matausina metoya ola karaiwaga,
21 Mapaila ibodi binokagutokisi baisa Guyau paila la mitakwai,
22 Ibodi bigabwaisi lula bivigakaisi si nokagutoki baisa Yaubada,
23 Mimilisiga ikokewasi osi waga ikwaidadinasi
24 Igisaisi avaka Guyau gagabila bivagi,
25 Karaiwaga e utuyagila itokaia
26 Kaisai ilupi waga ilau walakaiwa,
27 Ikatupupeili deli isilibeibeusi makawala matausina eimomsi kabotutu
28 E oluvi metoya osi tuta mwau idousi baisa Guyau,
29 Ivigaki utuyagila biniwavila,
30 Toluguta imwasawasi paila niwavila,
31 Mapaila ibodi binokagutokisi baisa Guyau paila la mitakwai,
32 Ibodi bikamitulaisi matauna Tovakaigaga osi sigugula tomota
33 Guyau ivigaki waya bimada,
34 Ivigaki kwabila kubilumalala bimila kubiliyayana wala,
35 Ivigaki viloupakala bidavila bimila katuwotu
36 Itagwala tonamakava bimili valusi mapilana
37 Ibigubagulasi e ivalaisi matamna waini,
38 Guyau imitukwai la tomota e iunigeyaisi litusia bidubadu
39 Tutala Yaubada la tomota imamasi deli kasi mmosila
40 e Yaubada ikaluwou matausina tolamadada
41 Mitaga ikoli tonamakava metoya osi ninamwau,
42 Tomitukwaibwaila igisaisi baisa e imwasawasi,
43 Ibodi tokabitam bininamsaisi vavagi makwaisina,