1 E olumoulela utuyagila Guyau ilivala baisa Yobi.
2 Availa yoku kukwatukoyai ulo kabitam
3 Mwa! Kutuvaluwa kutokaia
4 Ki, yoku kusisu avai tuta labubuli valu watanawa?
5 Availa inagi kala vakaila ke?
6 Ki, avakaga kala daga kokolela valu watanawa,
7 Ka, eikikivi visiga yam makwaina labubuli valu, utuyam iusiwosisi gulitinidesi
8 Tuta matutona valu watanawa eiuni bolita,
9 Ka, mayeigula, lowalowa lavigaki bolita kala kwama,
10 Akalituli bolita kaligeila
11 E aluki kawagu, “Ka, baisa kam kwaligei!
12 Mwa, Yobi! Ki, om tuta tomomova,
13 Kaina lokuluki visiga bisimitali valu
14 Yam lumalamela bivigaki dubakaila deli itayatila
15 Lumalamela yam bivigaki saina migileu paila tomitugaga,
16 Ki, sitana kuliloutala makaduyosina sakala olopola tukutaku ke?
17 Ki, sitana availa ivitulokaim kalapisilela Tuma,
18 E kudoki ammakawala kala vakaila valu watanawa ke?
19 E kaina sitana kunikoli lumalama ammetitoya leimaima?
20 Ki, igagabila bukuluki lumalama deli dudubila bilosi osi keda okala vigimkovila,
21 Adoki ibodaim wala, paila yoku saina tomoyabogwa, kadai!
22 Ki, yoku sitana kula kuvakawoli ulo bwaima
23 Lakatubiasi makwaisina paila tutala mwau,
24 Ki, yoku kulokaia valu mapilana kalasia la kaboyuwoula
25 Availa ikelisasi la keda kuna kunoveka,
26 Availa ikaraiwogi kuna bikuni
27 Availa ivinumli valu otutala waigigi,
28 Ki, kuna deli numla isim tumasi kaina?
29 E availaga inasi sopi kwekulokula deli numla pilapupwakau ke?
30 Makwaina ivigaki sopi imila dakuna,
31 Ki, igagabila bukusailavi gulitinidesi maladana Uluwa,
32 Ki, gagabila bukuvakadi minasina utuyam bilokaiasi okasi kweluva,
33 E kaina bogwa kunikoli uvagila walakaiwa kasi karaiwaga.
34 Gagabila bukudou mapilasina lowalowa
35 E kidamwa bukukwaraiwogi kavikavila mwada bikavila,
36 E availaga biluki minana dauta mwada bogwa la tuta niwavila,
37 Availa isim la kabitam ibodi bikalau mapilasina lowalowa,
38 e bisigoli tubumyou bivigaki bimila bidakavava?
39 Ki, ibodi bukunevi laiyoni kʹasi paila bikamsi,
40 avai tuta ikanupepunisi okasi lagi,
41 Ki, availaga bivakoma minasina bulibuli