1 Niaame oyae meda palima kone ima yaere Adaa Aa-me epe ta-ga pipa tea-da pamina.
2 Niaana pema oyae luaburi Gote-na ini agaa mada redepo ta kone ima.
3 Neme yae meda pulalo pali-daare Adaa Aa nipuna ki-nane aba saape.
4 Adaa Aa-me oyae luabu waria kogono padane padane laatapu kata. Go-rupa agu Adaa Aa-me waea peme aanu page nipumi warisa.
5 Adaa Aa-me waea pua nimuna bi minasaeme aanu adape ora gime omea.
6 Aa medame Adaa Aa mada raana waru omo nipu raapu pogatu piralipiri gore Adaa Aa nipumi go aana wae yae luabu mea rubalia.
7 Gore aame mo Adaa Aa nipuna raana omea kone luabu ratua nipuna iaanu raapu epe kone sua piralia-rabu Adaa Aa-me rabamua epe onaa raapu mapiraalia.
8 Neme oyae ogesi sa awa Adaa Aa ratulalo pali-ri mo mone akore i mi onaa page rabuawa wae pupitagi no aaya aa page rabunialia.
9 Niaana pape yaenu mada kone penaloa pulalo pema
10 King pia aa mudumi Adaa Aa-me laketa agaa onaame pagenalo laketa rabu pageme.
11 Adaa Aa-me oyae waru mua epe-rupa redepoya rumainalo kone raapu kata.
12 Aa mudu king piame wae pupitagi kone luabu gimoa epe redeponea pinalo peme.
13 King nipumi ora agaa ria-teme onaa raaname omea.
14 King nipumi aa meda raatu yawaliare go aa nipu tumaomalia.
15 Gore king nipumi aa meda epe lo rabaa kaloa epea palia-re nipumi epe kone sua go aa epe-rupa mapiraalia.
16 Neme epe kone makuae yae luabu mealiri gol-para silva go yaenu luabu ora rabuaniaye.
17 Epe onaanumi wae yae ratape gimoa waru adoa pameme.
18 Wae pupitagi noa nena bi minasaawa ne apiyapa te-daare ne wae-rupa malopaalia.
19 Gore aa meda nipuna bipa nipu naara kone sua nipuna bi rabuaniaawa pitiare pupitagi ne aanuna raana meme kone page rabuaaya.
20 Aa medame ne mana-teade agaa waru aina madu pagoa piraliare ne epe-rupa pirali.
21 Aa numi makuaeme. Aa meda nipumi epe kone waru makuaalia-re mo teme agaa waru ruma adalia.
22 Gore aa meda nipu epe kone i yaliare go aa nipu ipa laipi kagaa pirape yae mua piri aa-rupa piralia.
23 Epe kone i aa nipumi kone aba rumaawa epe kumapi agaa orope teme.
24 Epe agaa-re ora epe redepi alubi apaa-para mena midi-lapome adea.
25 Aa medalomame nimuna pema yae luabu epeta kone sua pora pameme pare ota.
26 Kogono peme nakinumi makuaeme.
27 Wae au peme onaa luabu maoya tulalo pora rado rado asapeme.
28 Waea pi aame-re onaana rikiraane wae bomo agaa mea lopawa nimu yada-yada waru mapaya.
29 Yadapi aa-mere nipuna adapi aa omeme pua wae pora-para yola pea.
30 Aa medame aa meda-para ini adupi adupi paliare neme mada makuali mo aa nipumi waea pulalo pea.
31 Yomagae nimuna kama iri adoa nimumi aba makuaeme. Go yomagae aanu nimumi ora epe kone su epe pora rateme-pulu go kone mada kamaa aya kone-imi.
32 Ratu ora aipapulu nayawea aamere nipu epe kone sua pea. Go konere puri paloa yada wini peme-rupa mada.
33 Kaasa saadu teme aanu-miri akea palua pae loa kone aba meme.