1 Aa medame ne-para ronopi agaa meda tea-dare nipuna agaa kumapimi abulape. Goa pali rabu nipuna ratu yawe kone dia yalia.
2 Aa medame epe kone sua epe agaa teare nimumi go aa-na kone makuae yae ora epeta loa raana omalimi.
3 Adaa Aa-me su luabu-para pea yae rayo ada makuaaya.
4 Aa medame epe agaa onaa luabu laketa rabu go agaa pageme onaa luabu nimu laipi kalape repena nonapina agaa pagalimi.
5 Aa meda nipu epe kone na-saliare nipuna aapana agaa rasita.
6 Epe aanu nimu luabuna ada-para oyae ora adaapu imi.
7 Epe kone imi aanumi onaa luabu epe kone kateme.
8 Adaa Aa-me waea peme aanuna opa kateme yae luaburi ora gimea.
9 Adaa Aa-me wae aanumi peme yae luaburi ora raaname naomea.
10 Aa medame epe pora minarepaliare wae yoto mealia.
11 Adaa Aa-me aba ome onaa luabu pimi-para ado kiritea.
12 Aakone i aamere pa aa medame nipu maredepo yaina kone ora na-ia.
13 Gore aa medana robaa-para epe kone saliare nipuna ini agaa-para epealia.
14 Epe kone ia aamere puri palo kogono waru pua oyae meape madaa page makuae yae meape mada page kogono pea.
15 Aa meda nipu oyae rudu ta raburi oro yalo kone adaapu sua nipu wae-rupa piruaya.
16 Gore neme oge oyaesinu saa pirua Adaa Aa-na agaa pago ratua nipuna rolo-para piti-daare gore ne epe-rupa pirua kedaa riawa yaeme mone adapu i amope page rabuaniaaya.
17 Aa yago raana ome kone-re ririnane agaa go yade. Nena adami aanu raapu meda-para pirua padi raani no piralimiri gore epeta.
18 Ratu yawea aamere mo aa meda page ratu mayawaya.
19 Kiaa rakepene aamere nipu epe kumapi-rupa pirape yaere ota kone ia. Goa peapulu nipu pa raa rugulua pamuaya.
20 Epe kone i naakiri agi aarame raaname omepe.
21 Epe kone na-i onaa-me maeyae kone ratape page pedo waru peme.
22 Neme kogono meda pulalo pali-dare aanu adaapuna kone aba meape. Goa pali raburi mo nena palide kogono luabu ora epealia.
23 Aa medalomame agaa lo pitimi rabu riaa lo kiritina loa neme epe agaa meda te-daare go rabu ne page raana palia.
24 Epe kone i aare so madaa porana opasari pea-pulu nipu epe-rupa pirape pada puaa mealia.
25 Aa meda nipuna bipa nipuna bi minasalia rabu Adaa Aa-me nipuna ado bebo malalia.
26 Wae kone luaburi Adaa Aa-na ini agaa madaa pugu waru pea.
27 Aa medame mone adaapu orayo kone sua wae pora ratua mealiadare nipuna ona nogo naaki-na rikirane wae keda mea epea.
28 Epe redepone aame kone aba waru niminaawa aa medana agaa orope abuta.
29 Waeanu peme aanu nimuri Adaa Aa raapu repara nae mopare yolamonea aeme.
30 Neme aa meda adali rabu ini agaa-para esepea raaname omalia-dare epe kone go ida.
31 Aa medame nipu maredepo yatalo palia rabu aane luyapa ina pirua pagaliri nipu epe kone sua makuaali.
32 Epe-rupa pirape madaa maredepo-yatalo palimi rabu agaa rasua gimaliare nipuna bipa nipu ma-oyaaya.
33 Adaa Aa-na rolo-para awalidare epe kone meape porana re go iada.