1 Ikankanta' nan nidugah an pamhodmu, Apo Dios an mi'id di pogpogna,
2 Ya inila' an nan nidugah an pamhodmu ya minaynayun hi enggana,
3 Ya ni'tulag'a ay David an baalmu ya nan pento'mu an tatagum ti inalim di,
4 “Hay holagmuy mun'alih enggana,
5 Nan numbino'ob'on an wad abuniyan ya ulgudonday ina'inatmun umipanoh'a, O Apu,
6 Ti mi'id di nipaddung ay He"a, Apu, hinan wad daya,
7 Ya wa ay goh ta ma'amungda nan a'anghel hinan way hahapitonda ya nidugah an ta'tan da'a, Apo Dios,
8 O Apo Dios an nidugah di abalinana, undan nin way nipaddung ay He"a?
9 Ya ta"on nan baybay an nundatong ya abalinam an mandalon,
10 Ya He"ay nama"i ay Rahab, at ay tindalun napatoy,
11 Immannung an He"ay ad hakup an amin hinan wad abuniyan ya an amin nan wah tun luta
12 ya He"ay nunlumuh nan buhu'an ya alimuhan di algaw,
13 Ti nidugah di abalinam, Apo Dios,
14 Nan anahamad di ugalim ya nan adi mibahhaw an panumalyam di pamanuhmuh nan pumpapto'am,
15 Ya mipa'amlong nan tagun nanginnilah aatmu
16 At hiyanan iyal'algawdan gun mangulgud hinan nangatmun dida,
17 Ya He"ay nangidat hi bi'ahda,
18 Ti He"an Apumiy nahamad an baliwmi,
19 Hidin nadnoy ya numpa'enap'ah nan un'unnud an tatagum, ya inalim ay diday,
20 Ya nan baal'un hi David di pento"u,
21 At munnonong di badang'un Hiya,
22 ya ta nan mamuhul ay Hiya ya mid ologdan mangabak ay Hiya,
23 Ya pun'ipa'abak'un Hiya an amin nan mamuhul ay Hiya,
24 Ya adi mapogpog nan nahamad an pamhod'un Hiya,
25 Ya Hiyay pumpapto'o' an mete"ah nan Baybay an Mediterranean
26 At alyonan Ha"in di, He"ah Ama,
27 Ya Hiyay ibilang'uh pangpangulluh imbaluy'u,
28 Ya nan adi malumluman an pamhod'un Hiya ya minaynayun hi enggana,
29 Ya nan holagna goh di mahinhinukat an mun'alih engganan umat hi ad abuniyan an mid pogpogna.
30 Mu gulat ta adi unudon nan holagnay Uldin'u,
31 ya gulat goh ta ilahulahda nan Uldin'u,
32 at nidugah di pummolta' ay didan dumalat di baholda,
33 Mu adi' pogpogon nan pamhod'un David,
34 ya adi' ahan pa"ion nan ni'tulaga',
35 Ha"in an me'gonan ya inhapata' hidin ni'tulaga',
36 ti minaynayun an nan holagnay mumpapto' hi enggana
37 ya nihamad nan pumpapto'ana,
38 Mu ingnganuymu ya ma'abbungot'ah nan pento'mun ali,
39 At nabahibah din intulagmun hiyan baalmu,
40 Ya numpa"im nan allup di babluyna,
41 Ya an amin din naluh ya nunhamhamda nan gina'uh di,
42 Ya nangabakom nan buhulnan din nangubat ay hiya
43 Ya numpikum din gina'udan mi'gubat,
44 Ya pinogpogmu goh nan a'e'gonana,
45 Ya un na'amtang di nun'aliana,
46 O Apu, anuud di pangipogpogam hi adim pumpattigan ay da'mi?
47 Nomnomom ni', Apu, an he'he'dod di pi'tagua',
48 Mi'id ahan ah ohah matattaguh enggana
49 O Apu, uggoh mah din adi malumluman an nidugah an pamhodmun da'mi tuwali
50 Adim ni' aliwan, Apu, ta tigom tun pamahipahiwandan ha"in an baalmu
51 Ya hiyah te inat nan namuhul ay He"a, Apu,
52 At hay maphod ya un hi Apo Dios di idaydayaw tu'uh enggana!