1 O Apo Dios an Dios an namaliw ay ha"in,
2 at donglom ni' nan iluwalu' ay He"a ta badangana'
3 ti ten nidugah an maligligatana' hinan do'ol an nappuhin ma'ma'at ay ha"in,
4 At ten midduma' ay daten munhood hi ilubu'anda ti ten mi'id bi'ah'u,
5 ya umata' hinan nun'atoy an mid nomnomda
6 Ya impiyuya' hinan ma'alluhung an bitu an helong ahan di bunolna.
7 Ha"in di nangipuhayam hinan nidugah an bungotmun
8 at hiyanan nuntaynana' hidin nahamad an liligwa',
9 Ya ten adi tummig tun mata' ti mamaphung hi lugwa' an dumalat nan punlungdayaa'.
10 Undan nin nan nun'atoy di pangipattigam hinan atom an umipanoh'a?
11 Un mah mabalin an ul'ulgudon nan nun'atoy an wah nan lubu' di aat nan nidugah an pamhodmu?
12 Ya undan mabalin an tigon nan wah helong ya inul'ulgudda nan umipanoh'an atom?
13 Mu ha"in, Apu, ya gunna' mumpabaddang ay He"a,
14 Anaad ahan, Apu ta inganuya' ay He"a?
15 Nete"ah din a'unga' di nunholholtapa' an hi'ihi'itangan di ataya',
16 Nan nidugah an bungotmuy nangipaligligat ay ha"in,
17 Ya unna' linili'ub hi abigabigat hinan mangipaligligat ay ha"in
18 At hiyanan nuntaynana' hidin liligwa' ya din pamilya',