1 Immannung an hi Apo Dios ya maphod di pangatnah nan holag Israel,
2 Mu ha"in ya hi'itangan an ma'ubah di denol'u ya pangulug'un Apo Dios
3 an dumalat nan immamoha' hinan nun'appuhiy ugalidan mumpumpahiya
4 Hay pannig'u ay dida ya mid punligatanda,
5 Ya mid punholtapanda an adida umat hinan udum an tatagu,
6 At hiyanan nidugah di pumpahpahiyaanda an ayda imbuung,
7 Ya mumpangalatunnu' di matadah tinabada,
8 Ya hinhannulondan abatlan nan i'ibbadan tatagu,
9 Ya numpahaldah Apo Dios an wad abuniyan,
10 At hiyaat un ta"on nan tatagun kimmulug ya unudonda dida
11 Ya alyonday,
12 Umat hinay nun'appuhiy ugalida an adida maligatan,
13 At mid hulbin nin an amin di gun'u inat an agguya' numbahbahol
14 Ya a'alga'algaw ya gunna' punholholtapon ay He"a, Apo Dios,
15 At gulat nin ta umat hinay nomnomnomo' ya nibahhaw
16 Ya ninomnonomnom'uy dumalat ta ma'at an amin hana ay ha"in,
17 ta engganah unna' immuy an nundayaw hinan Timplum
18 Ti immannung an nan mundongngol an dalan di pangipa'wam ay dida
19 Ya himbumagga ya nun'a'ubahda an mamengpenghan ya napogpogda,
20 at ma'ubahda, Apu, ya ma'aliwanda
21 Ya hidin punlungdayaa' ya punha'itan di punnomnoma'
22 ya umata' hi nabongang ya manangpah,
23 Mu ta"on damdama ya inaynayun'un middum ay He"a ta halimunana',
24 ya itudum di ato' ta hay umangunuh ya abulutona' ta midduma' ay He"ad abuniyan.
25 At mi'id di udumnah hapulo' hi amnawa' hitun luta ya ta"on ad abuniyan,
26 Ya ta"on hi un mami'id di bi'ah tun odol'u ya nomnom'u mu He"a, Apo Dios, di mangipabi'ah ay ha"in,
27 Mu hanan tatagun man'ug ay He"a ya milahhinda,
28 Mu ha"in ya pohpohdo' an mimiddum ay He"an na'abbagbagtun Dios ti He"ay Apu' hi ihi'uga',