1 Apo Dios, iluwalu' an ituduwam nan ali ta nahamad ya mapapaddung di panumalyana
2 Ya ta nahamad di pun'ap'apuwanah nan tatagum
3 ta pumhod ya umadangyan nan babluy
4 At badangam nan ali ta mapapaddung ni' di panumalyanah nan nun'awotwot an tatagu,
5 Ya minaynayun ni' di pangipapto'muh nan tatagum an un'unnud ay He"a
6 Ya pumbalinom nan ali an mabmabadang
7 Ta henen gutud di pun'ap'apuwana ya mun'aphod di ugalida,
8 Ya mumpapto' Hiya an mete"ah nan pingit di baybay ta engganah nan pingitna goh,
9 Ya ta"on nan numpunhituh nan mapulun ya mumpunhippidan mange'gon hinan ali,
10 Ya nan a'alid Tarshish ya hinan adadagwin babluy ya umidatdah adawdah nan ali,
11 At an amin nan a'ali ya munhippidan mange'gon ay Hiya,
12 At baliwana nan agogohgoh an tataguh unda mumpabadang,
13 At hom'ona nan mid abalinana ya nan nun'awotwot,
14 Ya baliwana didah nan way mangipaligat ya mamatoy ay dida
15 Ya ud'udmam di ataguana ta matubayan Hiya!
16 Ya wagaham nan nihabal hinan dudunduntug ta malumongda,
17 Ya minaynayun ni' hi engganah nen ali an adi ma'aliwan di ngadana
18 At ipabagbagtu tu'uh Apo Dios an Dios nan holag Israel
19 Ya mipabagtu nan ngadanah mi'id di pogpogna,
20 Hiyah ne angunuh hi luwalun David an hina' Jesse.