1 Apo Dios, He"ay paddungnay ihi'uga',
2 Ya baliwana' an dumalat nan mid nipaddungan nan aatmu,
3 He"a nan ay batu an punhi'uga' hi gun'u ayan,
4 Baliwana' ni' an Dios'uh nan aton nan nun'appuhiy ugalidan tatagun mun'abungot ya atata'ot
5 ti He"a an na'abbagbagtun Dios di nangehdola' hi nitagua' an nete"ah din a'ung'ungnga'.
6 Ya nete"ah din awada' hi putun ina ta engganad ugwan
7 Ya hay nitagua' di pangiyunnudan nan tatagu ti He"ay mabi'ah an ihi'uga',
8 at hiyaat un'u adi ipogpog an gun mangipabagbagtun He"a,
9 At adia' ni' ahan inganuy hi unna' mala'ay an mid mahkay olog'u
10 ti nan mi'buhul ay ha"in ya nappuhiy hapihapitondan ha"in,
11 Ti alyonday,
12 O Apo Dios, adia' ni' nongkay inganuy ta punnaudom an bumadang ay ha"in,
13 ya olom at ni' ya mabainan hanan buhul'u an munnonomnom an mamatoy ay ha"in ta diday ma'ubah!
14 Mu He"ay gun'u ehdol hi mamadang ay ha"in,
15 Ya gun'u ulgudon hinan tataguy aat di amaphod nan ina'inatmu
16 At dumalat nan nidugah an abalinam an na'abbagbagtun Dios
17 Ya nete"ah din a'ung'ungnga' ya intuduwana' an dumalat nan mun'aphod an ina'inatmu,
18 Ya ta"on hi unna' mala'ay ya ma'ubanan ya adia' ni' ahan inganuy, Apo Dios,
19 Apo Dios, ta"on un ad daya ya na'innilay amaphodmu,
20 Ya inyabulutmuy nunholtapa' hinan nunligligata',
21 Ya nidugdugah di indatmuh a'e'gona'
22 At ikanta' ya ipagangoh'u nan alpa ya lyre hi pangipabagbagtua' ay He"a ti nan nangatam hi ipaphoda',
23 Ya it'u"un mungkanta ti umamlonga' an mangipabagbagtun He"a
24 Ya iyal'algaw'un ipa'innila nan mun'aphod an inatmun namaliw ay ha"in