1 Nahamad an malpuh tun puhu' di pundayawa' ay Apo Dios,
2 Ya Hiyay immannung hi dayawo',
3 Ti inaliwanan amin di bahol'u,
4 ya Hiya goh di mangibaliw ay ha"in ta matagua',
5 Ya an amin nan mahapul'uh tun atagu' ya indatna,
6 Hi Apo Dios ya nahamad di panumalyana an adi mipangngel,
7 Ya impa'innilanan Moses nan pohdonah atonda,
8 Hi Apo Dios ya nidugah di homo'na,
9 Ya ihingal ditu'u,
10 Ya wa ay ta moltaon ditu'uh nan pumbaholan tu'u ya miyane'nong
11 Ti hay pamhod Apo Dios hinan tagun waday ta'otna ya mundayaw ay Hiya ya nidugah
12 Ya umat goh hinay inatnan nangaliw hi bahol tu'u ti inaana ya intapalnah nan pa"adagwi
13 Ya hay ama'ma'ullay Apo Dios hinan un'unnud ay Hiya
14 ti inilanay aat tu'un hay lutay nalpuwan tu'u.
15 Nan nitaguan tu'uh tun luta ya he'he'dod an umat hinan holo',
16 ya immali nan tuyup,
17 Mu nan tatagun hi Apo Dios di ita'otda ya unudonda ya minaynayun di pamhodnan dida,
18 unda unudon nan Uldina,
19 Ya hidid abuniyan di nangihamadan Apo Dios hi ihinanan mumpapto',
20 At da'yun a'anghel ya ulgudonyu nan a'al'alyan Apu tu'u,
21 Ya da'yun udum an wad abuniyan ya hapitonyu goh di a'al'alyan Apu tu'u,
22 Ya an amin ayun limmuna ya ul'ulgudonyuy a'al'alyana