1 Apo Dios, donglom ni' nan iluwalu',
2 Ya adia' ni' du'gon hinan gutud di punluwalua' ta unmuat ni' ihamad an donglon,
3 ti ten umat hinan ahu' di a'ubahan di nitagua',
4 At ten munlunglungtuya' an umata' hinan nalyaw an holo',
5 ya ammunah unna' umale'alengeng,
6 At umata' hi hamutin akup an wah nan mapulun,
7 Ya unna' tumutu'al
8 At padngopadngolana' hinan buhul'uh abigabigat,
9 Ya nan dapul di paddungnay itanud'u,
10 ti dumalat nan nidugah an bungotmu,
11 At tun nitagua' ya umat hinan ngauh nan mun'a'ahom,
12 Mu He"a, Apo Dios, ya minaynayun an mid pogpog di pumpapto'am,
13 At ihi'almu ta hom'om ad Jerusalem ti ad ugwan di gutud hi pammo'am hidi,
14 Ti pa'appopohdonmin tatagum henen babluy an ta"on un nun'apa"i,
15 Ya an amin nan Hentil hi abablubabluy ya ta'tan da'a, Apo Dios,
16 At mattig di anidugah di abalinam hi pangipaphodam ad Jerusalem,
17 ya donglom mahkay nan luwalun nan nun'awotwot an tatagu,
18 At mahapul an mitudo' hanan na'na'at ta way panginnilaan nan agguy pay nitungaw an holag tu'u
19 Ya umat hituy itudo'yu:
20 at dodonglonay alengeng nan nun'ibalud,
21 At muntembag ya midayaw di ngadanad Zion hidid Jerusalem
22 hinan gutud di a'amungan nan do'ol an tatagun malpuh nan numbino'ob'on an babluy
23 Apo Dios, unna' ahan unga',
24 Mu nunluwalua' ay He"a an inali' di,
25 Ti hidin penghana ya limmum tun luta,
26 Ya ma'ubahdan amin hana,
27 Mu He"a ya adi malumluman di aatmu,
28 Ya nan holag nan tatagum ya minaynayundan He"a,