1 Nan tagun ta"on unda gun tugunon mu gunna ipahelot di nomnomna ta gunnaat goh iyal'allan mangat hi nappuhi
2 Wa ay ta nan nahamad di pangatnay mun'ap'apuh nan ohan babluy ya umamlongda nan tataguna,
3 Umipadenol ay amana nan imbaluynan mamhod an manomnoman,
4 Papaddungon ay nan aliy atonah nan ipapto'na at minaynayun an gun pumhod nan babluy an pumpapto'ana,
5 Nan tagun mamalbalih nan heneggona
6 Nan tagun hay nappuhiy gunna aton ya hiyah ne dumalat hi abahbahana,
7 Nan nahamad di pangatnan tagu ya inilanay aat di nahamad hi aton hinan nun'awotwot,
8 Nan tatagun pumihupihul hi i'ibbada ya unda guluwon an amin nan ni'babluyanda,
9 Mi'id hulbinah un idiklamun nan nanomnoman nan adi mangngol ti nan adi mangngol ya ngumalawngaw ya un bumungot,
10 Nan tagun nangipa'enghan pumatoy ya ma'abbohhol hinan nahamad di nomnomda
11 Nan nakudang di nomnomnan tagu ya adi bumain an mangipattig hi bumungtana,
12 Gulat ta nan ap'apu ya kulugonan amin nan al'alyon nan tatagunan nibahhaw
13 Hay ohah numpaddungan nan nawotwot an tagu ya nan umipaligat ay hiya
14 Nan ap'apun mumpanuh hinan nun'awotwot ta mepto' di ato'atonan dida
15 Hay pangihingalan hi panugunan hinan ung'ungungnga ya nan paneteldan hinan way nappuhih atonda ya ta way pumhodanda
16 Wa ay ta nan tatagun nappuhiy ato'atonday mun'ap'apu ya iyal'allanay ma'ma'at hi nappuhi,
17 Nu waday muntugun hinan imbaluyna at immannung an mid al'alih abungda,
18 Nan tatagun agguy nanginnilah nan inyuldin Apo Dios ya immannung an atonday malgom hinan pohdondan aton,
19 Nan adi umunud an tagala ya immannung an adi umanay di hapitonyuh panugunyun hiya,
20 Nan tagun un namaaggan himmaphapit an adina ahan nomnomon di hapitona
21 Gulat ta iyabulut nan ad baal di malgom an pohpohdon nan baalna an mete''ah a'ungana
22 Nan tagun mabanbannungot di dumalat hi pi'hongngilana ya pi'pattayanah nan babluy an ni'hituwana.
23 Nan tagun mumpabagtu ya umangunuh at mipa'ampan dumalat henen atona,
24 Nan tagun bumadang hinan mangakaw ya un hay odolnay inlumlumna.
25 Nan tagun tuma'ot hinan nomnomon nan udumnan taguh aatna ya mi'id di abalinana,
26 Nan do'ol an tatagu ya pohdondan mumpabadang nan mun'ap'apun dida,
27 Nan tagun nahamad di ugalina ya pahiwonay nappuhin pangat di tagu,