1 Nan tagun nappuhiy pangatna ya ta"on un mi'id di mamdug ay hiya ya nonongan un lumayaw,
2 Nabaholan ay nan tataguh nan himpamabluy ta maguguluda at mahinhinukat di mun'ap'apun dida,
3 Nan ap'apu an mangipaligligat hinan ibbanan nun'awotwot
4 Nan tagun adina unudon di Uldin ya iyamlongnay ato'aton nan nappuhiy pangatna,
5 Nan tatagun nappuhiy ato'atonda ya adida ma'awatan nan aat di makulug hi aton hinan udumnan tagu,
6 On'onaynah un nawotwot nan tagu mu ta nahamad di pangatna
7 Nan ungan un'unnud hinan Uldin ya hiyay nanomnoman an imbaluy,
8 Waday ma'at hinan tagun umadangyan an dumalat nan mumpatakap hi ongol hinan umutang an tatagu
9 Umipabohol ay Apo Dios nan adi mangunud hinan Tuguna,
10 Nan mangitudul hinan tagun nahamad di pangatna ta atonay nappuhi ya la'tot ya hiyay mabahbah an dumalat nan ato'atona,
11 Wa ay ta nomnomon nan adangyan an tagu an hiyay na'annomnoman,
12 Gulat ta nan nahamad di pangatnay mangabak hi mun'ap'apu at nidugah di pun'am'amlongan nan himpamabluy,
13 Nan tagun mangipo"oy hi baholna ya mi'id di punhulbian an amin di atona, at adi ahan pumhod di nitaguana,
14 Mawagahan nan tagun gun mangita'ot ay Apo Dios,
15 Umipata'ot nan ap'apun nappuhiy ato'atonah nan tatagunan mid abalinanda
16 Nan ap'apun nappuhiy nomnomna ya paligatona nan tatagun ipapto'na,
17 Umipaligat nan tagun pimmatoy mu agguy pay nadpap ti immannung an gun mipanomnom ay hiya nan inatnan nappuhi,
18 Mahalimunan nan tagun nahamad di pangatna,
19 Nan tagun mahmahlun munhabal ya do'ol di mahawal hi tanudna,
20 Nan na'na'unnud an nahamad di pangatnan tagu ya hiyay mawagahan,
21 Nappuhi nan tagun munhumalyah un waday pangipangngilana,
22 Nan nagitilan an tagu ya pohdonan munnaud an umadangyan,
23 Hay pohpohdon nan tataguh punyamanandah ma'at ay dida ya nan pangihingalandan didah un way inatdan nappuhi
24 Nan tagun mangngal hi gina'un amana unu hi inana ti hay punnomnomana ya bo'on bahol henen atona
25 Nan tagun ma"unguh an mumpunghan ya hiyay dumalat hi punhahannuan nan tatagu,
26 Nan tagun hay nomnomnay pange'kodana ya nakudang di nomnomna,
27 Nan tagun nanginnilan hummo' hinan nun'awotwot ya adi makudangan hi mahapulna,
28 Wa ay ta nan nappuhiy pangatnay mun'ap'apuh gubilnu ya mun'ipo"oyda nan tatagun maphod,