1 Adim iyamlong di ninomnommuh atom hi ma'et
2 Maphod hi un hay udumnan taguy mangul'ulgud hi aat di amaphod nan pangatmu
3 Immannung an naligat di mumpi'ug hi batu ya panag ti mun'adamotda,
4 Naligat an medpol di bungot,
5 Od'odolnah un way tagun mangihingal hi ibbanah unna aton di nappuhi
6 Ta"on un'a mah'itan an dumalat di pangihingalan nan i'ibbam ay he"a ti ma"aphod di umat hina
7 Na"abhug ay nan tagu ya ta"on un nan danum di alig ya adina pohdon an tamtaman,
8 Nan tagun manaynan an umadagwih nan nunhituwana
9 Immannung an umipa'amlong nan panugun di nahamad an ligwa
10 Adim inganuy nan liligwam ya nan liligwan nan o'ommodmu ti wa ay ta mumpabadang'a
11 He"an imbaluy'un lala'i, umipadenol ay ha"in hi un'a luma'eng ta manomnoman'a,
12 Nan tagun nanomnoman ya immatunanah un waday nappuhin ma'at ay hiya, at halimunanay odolna ta adi ahan ma'at,
13 Mahapul an waday alanyuh gina'un nan tagun mangita'dog hinan tagun umutang ta pamatangna,
14 Gulat ta unmu ibugaw di pangapngaam hinan heneggonmuh nan pa'ahhelhelong
15 Nan babain gun mi'hongngel hi ahawana
16 Ti ta"on hi un gun ipadah nan lakaynan ipadinong hiya mu adi mabalin
17 Nan kelkel ya mabalin an kelkelona nan ibbanan gumo' ta tumadom,
18 Nan tagun manalimun hinan nitanom an fig ya immannung an malagbuan ti ononay bungana,
19 Nan mapaganah an danum ya umat hinan halmeng ti ipattignay aat di angah di tagu,
20 Nan linala'i ya mid apogpogan di amnawda an umat ay da Atayan ay A'ubahan
21 Nan apuy di mun'anang hinan balitu' ya silver,
22 Nan tagun nakudang di nomnomna ya ta"on un way mamaligat an manaplat ay hiya ta engganay un mun'ugung ya adi damdama maluman di aatna
23 Mahapul an ipapto'mun halimunan nan a'animalmun kalnilu ya gandeng
24 ti nan inadangyan ya mapogpog an umat hinan punhaadan di ali an adi minaynayun.
25 At wa ay ta nalpah an indadaanmu nan do'ol an holo' an mumballun wah nan dudunduntug ta waday ipa'anmuh nan a'animalyu
26 ya mabalin mahkay an ipiyammam di lubungyu an malpuh nan dutdut di kalnilum,
27 Ya nan udum an ma'angang hinan gandeng di hiyay pangngalanyuh gatas hi inumonyun hina"ama ya an amin nan nekkop ay da'yun binabai.