1 Adiyu amhan nan tatagun nappuhiy ato'atonda,
2 Ti un hay gumuluwanday nomnomnomonda,
3 Nan nanomnoman an tagu ya nahamad di iyammanah punhituwanda
4 Ya dumalat nan anala'engna ya punuwonay abungnah do'ol an mun'aphod ya nan mapla'an an gina'u.
5 Nan nanomnoman an tagu ya ma"aphod di anala'engna ya un nan tagun nidugah di bi'ahna
6 Ti nan umuy mi'gubat ya mumpatugundah mahhun hinan nun'anomnoman ya unda makak
7 Nan tagun nakudang di nomnomna ya adina ma'awatan di hahapiton nan nun'anomnoman,
8 Nan tagun hay gunna nomnomon ya un nan nappuhin pangat,
9 At an amin nan nun'appuhin nomnomon nan nakudang di nomnomna ya bahol,
10 Nan tagun adi pa"edpol hinan way aligatana ya immannung an itang di abalinana!
11 Baliwanyu nan tagun mi'id ah inatnah nappuhi mu iyuyda hiya damdama ta ipapatoyda.
12 Mu gulat ta alyonyuh nomnomyuy,
13 He"an imbaluy'u, maphod hi unmu inumon nan danum di alig ti ipaphodnay odolmu,
14 Ya umat goh hinay aat di atom an manomnoman ti immannung an ipaphodnay nitaguam,
15 Adim iyunnud hi aton di mangakaw an bota'ona nan tagun nahamad di ugalina
16 Ti nan tagun nahamad di ugalina ya anuhana ahan an ta"on hi un way do'ol an ligatna.
17 Adi'a umamlong hi un way nappuhih ma'at hinan pi'bohholmu,
18 Ti inilan Apo Dios an amin di ato'atom,
19 Adi'a numanomnom an dumalat nan maphod an ma'at hinan tatagun nappuhiy pangatda,
20 Ti nan tatagun nappuhiy pangatda ya immannung an mi'id maphod hi ma'at ay didah udum di algaw
21 He"an imbaluy'un lala'i, e'gonam hi Apo Dios, ya e'gonam goh nan ali.
22 ti didan duwa an inali' an me'gonan ya abalinandan mummoltan he"a,
23 Hiya hatuy udumnan intugun nan nun'ala'eng ya nun'anomnoman an tatagu:
24 Ti gulat ta alyon nan munhumalyah un mi'id di bahol nan numbahol
25 Mu nan huwis an mangipa'annung an mummoltah nan nabaholan ya hiyay mawagahan,
26 Nan tagun hay immannung di pambalnah nan way mibagan hiya
27 Awni ta munhabal'ah nan payawmu ta waday malmu ya unmu mahkay iyammay abungmu.
28 Adi'a mun'ihtiguh nan heneggonmuh un mi'id di inatnah nappuhi,
29 Unu adim goh alyon di,
30 Wa han ohan algaw ya immuya' an nunle'le'od hinan payaw ya uman nan napayad an tagun nakudang di nomnomna.
31 Ya tinnig'un natawan,
32 Ya unat goh inamang'u ya ninomnom'uy aatna,
33 An gulat ta palpaliwam an momollo' ya yeyen'onmuy ngamaymu ta mun'eblay'ah na'amtang
34 at un na'amtang ya nawotwot'a