1 Wada ay di mangayag ay he"ah nan nabagtuy haadnan tagu ta me"an'an hiya
2 At ta"on hi un'a na'ahhinaangan ya mahapul an ane'nongom di onom.
3 Ya adim ilomo' an pun'iya'an hinan mumpolhat an indadaana ti mid mapto' ya un hay pampongnan he"a.
4 Adim idugah an paligaton di odolmun muntamu an gapuh nan pamhodmun umadangyan.
5 Ti nan inadangyan ya un himbumagga ya na'ubah an paddungnay napaya'an,
6 Adi'a umuy me"an hinan tagun nunheglay ukuhna,
7 Ya ta"on hi unna alyon ay he"ay, “Ma'a ta uminum'a ya nangan'a!”
8 At munha'it di punnomnommuh unmu innilaon an nabalbaliyan'a,
9 Adiyu tugunon nan tagun nakudang di nomnomna
10 Adiyu anon nan batun imbatno' din a'apuyuh din penghanan igad
11 ti hi Apo Dios an mamaliw ay dida ya nidugah di abalinana,
12 Ihamadyun unudon nan maphod an mitudtudun da'yu,
13 Adiyu higanan an mangilat hinan ung'ungngan imbaluyyu
14 Ti henen atonyu ya ta way atonan man'ug hinan nappuhin ma'at an lummuh atayan.
15 He"an imbaluy'u ya gulat ta manomnoman'a ta nahamad di pangatmu
16 Ya iyal'allanay amlong'uh un hay immannung di hapihapitom hi anomnoman.
17 Adi'a umamoh an me'yat hinan nun'appuhin ato'aton nan tatagu
18 Ti umat ay hinay atom at maphod di ma'at ay he"ah udum di algaw,
19 He"an imbaluy'un lala'i ya ihamadmun donglon tun tugun'u ta manomnoman'a,
20 Ya adi'a mitnud hinan tatagun mabubutong ya nun'a'uklung hi ma'an
21 ti awni ya mawotwotda,
22 Donglom nan itugun amam ti hiyay dumalat ya un'a wada,
23 Maphod hi un'a manomnoman ta innilaom di nahamad ya mumpatudu'a,
24 Umipa'amlong ay amana nan nanomnoman an lala'i
25 At olom man ya ipa'amlongmu nan o'ommodmu,
26 He"an imbaluy'un lala'i ya abulutom ahan ta ha"in di mangituduh atom,
27 Nan puta ya umat hi maluhung an bitu,
28 At du'gom dida ti ay ihunay unda mumbota' an humod'ap hinan way balbaliyanda,
29 Hay inilayuh ngadan di maligligatan?
30 Hay ngadanda ya nan mabubutong ti uminu'inumdah numbino'ob'on an bumutong!
31 At elanyu ta adi ayu mabalbaliyan hinan ma'inum
32 Ya manu ay alyo' hene ti awni ta mabiggat at nidugah an nappuhiy punle'nam
33 Ti wa ay ta mabutong'a ya nat'on di pannigmuh un way amangom,
34 Ya hay punle'nam ya umat hinan umuta'utan nunlugan hinan pupul an wah nan baybay an punhinnigion di puo'.
35 Ya alyom di, “Goh ya unna' nin nunhudpa', mu mi'id di munha'it!