1 Nan tagun mamhod an ma'udman di inilana ya abulutonan mumpatugun,
2 Nan tagun maphod di pangatna ya umipa'amlong ay Apo Dios,
3 Nan tagun hay nappuhiy pangehdolana ya umat hinan ayiw an mabu'nut hi umangunuh,
4 Miyamlong nan lala'in ad ahawah nan babain nahamad di ugalina,
5 Nan tagun nahamad di pangatna ya mepto' di ibadangnah nan ibbanan tagu,
6 Nan hapiton nan nappuhiy pangatnan tagu ya umat hinan hod'apel an pumatoy hi ibbanan tagu,
7 Nan tatagun hay nappuhiy gunda aton ya la'tot at miballoh ay dida, at mabahbah di holagdan mi'id ah ma'angang,
8 Nan nanomnoman an tagu ya miyamlong an mipabagtu,
9 On'onaynah nan na'ampan tagun mahlun muntamu ti waday tanudna
10 Nan maphod di nitaguana ya gunna hahalimunan nan animalna,
11 Nan tagun mahlun muntamuh nan lutana ya hiyay mahawal di tanudna,
12 Nan mangakaw ya pohdondan alan nan hinamham nan i'ibbadan mangakaw,
13 Mabainan nan tagun na"appuhiy pangatna ti mipa'innilah awniy agguy immannung an hapitona,
14 Umipadenol nan tagun maphod di panapitna,
15 Nan nabongang an tagu ya hay nomnomona ya do'do"ol di inilana ya un nan udumnan tatagu,
16 Nan nakudang di nomnomna ya nalakan mabanbannungot,
17 Nan tagun nahamad di pangatna ya makulug di pangihtiguna,
18 Nan panapit nan tagun un nonongan himmapit ya umat hinan matadom an hinalung an humugat,
19 Nan immannung an malpuh nan timid ya minaynayun nan amakulugnah enggana,
20 Umipaligat hi punnomnoman nan tatagun bumalbalih ibbadan tagu,
21 Nan tatagun nahamad di pangatda ya mi'id ah nappuhih ma'at ay dida,
22 Hi Apo Dios ya abohlana nan tatagun ahilaylayah,
23 Nan tagun nanomnoman ya adina iyamlong an iyal'aliy anala'engna,
24 Nan mahlun tagu an anuhanay tamuna ti umangunuh at hiyay mangipangpanguluh nan i'ibbanan tatagu,
25 Nan numanomnom hinan way ma'at di dumalat hi mangubah hi amlongna,
26 Nan maphod an tagu ya ihamhamadnan mamilih liligwana ta bo'on diday dumalat hi pumuhiana,
27 Nan tagun napayad ya adina ipulu' nan dotag an inanupana,
28 Nan dalanon nan tagun nahamad di aatna ya nan mipluy hinan wadan di pi'taguan hi mi'id di pogpogna,