1 Nan nanomnoman an unga ya donglonay itugun amana,
2 Nan maphod an tagun maphod di hapitona ya maphod goh di mumbangngad ay hiya,
3 Nan tagun mamhod an manalimun hi nitaguana ya hiyay mangane'nong hi hapitona,
4 Nan napayad ya adi pa"alah nan way a'amnawanan alan,
5 Nan tagun nahamad di pangatna ya boholonay layah,
6 Nan maphod an ugaliy paddungnay tindalun mun'adug hinan tagun maphod di pangatna,
7 Bo'on hay tigaw di taguy pangipattigan hi aatna tuwali ti nan udum an tagu ya ipattignay un adangyan mu hay immannung ya mi'mi"idan,
8 Wa ay ta madpap nan adangyan an tagu ya mahapul an bayadanay nitaguana ta baliwanay odolna,
9 Nan tagun maphod di pangatna ya umat hinan bubumnang an dilag an adi madmaddop,
10 Nan pumpahiyaan nan taguy dumalat hi do'ol an pi'hongngilana,
11 Nan pihhun nalakan ma'ala ya ag'agan ma'ubah,
12 Nan tagun nabaybayag di way namnamaona mu adi damdama ma'at ya hiyay munlungdaya,
13 Nan tagun mamahal hinan maphod an mitugun ay hiya ya mipaligligat,
14 Nan itudtudun nan nanomnoman ya umat hinan danum an bumuhubuhu' hinan obob an waday ibadangnah itaguan,
15 Nan tagun do'ol di inilana ya e'gonan nan tatagu,
16 Hay aton nan nanomnoman an tagu ya pa'annomnomonah mahhun nan ma'at ya unna aton,
17 Nan munlayah an mahnag ya lummuh gulu,
18 Hay pumbalinan nan tagun adi mumpatugun ya un hay lummuh awotwotana ya abainana,
19 Ma"am'amlong nan taguh un mipa'annung nan penhodnah ma'at,
20 Nan tagun gun mitnud hinan nun'anomnoman ya la'tot ya manomnoman goh,
21 Hay lagbun nan tagun mangamangat hi nappuhi ya nappuhiy ma'at ay hiya,
22 Nan nahamad an tagu ya wa ay ta matoy ya ipaboltanah nan a'apunay banohna,
23 Ta"on hi un way do'ol hi ihabal nan nawotwot mu adyu'a damdama
24 Nan adi mangilat hinan imbaluyna ya immannung an mi'id ah pamhodnan hiya,
25 Nan nahamad di pangatnan tagu ya mun'olog di tanudna,