1 Nidugah di pamoholan Apo Dios hinan agguy nepto' di pungkilunah nan way ila'una,
2 Hay ma'at hinan tagun mangipabagtuh odolna ya mipa'ampah awni,
3 Gapu ta maphod di ugalin nan nahamad an tatagu at adida mibahhaw hinan ato'atonda ti nan maphod an ugaliday mangituduh atonda,
4 Nan inadangyan ya mi'id ah ibadangnah nan gutud di punhumalyaan Apo Dios hinan tataguh tun luta,
5 Nan ugalin di tagun nahamad di pangatnay dumalat hi pumhodan di ato'atona,
6 Immannung an nan nahamad an pangat nan taguy dumalat hi abaliwana,
7 Wa ay ta matoy nan nappuhiy pangatna at mi'yatoy goh an amin di planuna,
8 Nan tagun maphod di pangatna ya hiyay mibaliw hi gulu
9 Nan ulgu'ulgudon nan tagun mid diosnay mamuhih nan heneggona,
10 Wa ay ta maphod di ma'at hinan tagun nahamad di pangatna ya mun'am'amlong nan ni'babluyana,
11 Ya wa ay ta nan nahamad di pangatday munwagah hinan babluy at pumhod,
12 Nan tagun nakudang di nomnomna ya pahalonay ni'tunglubna,
13 Nan tagun ma"ulgud ya wa ay di dengngolnaan immuyna inulgu'ulgud,
14 Gulat ta mibahhaw di aton nan mumpapto' hinan tatagu at ma'abakdah un way gubat,
15 Nan tagun mangita'dog hinan umutang hinan tagun agguyna in'innila ya muntutuyuh umangunuhna,
16 Nan babain ma'ma'ullay ya e'gonan nan tatagu hiya,
17 Nan lala'in ma'ma'ullay ya hay odolnay binadangana,
18 Nan bino'lan di mangamangat hi nappuhi ya un na'amtang ya na'ubah,
19 Nan tagun manginaynayun an mangat hi maphod ya pumhod di nitaguana,
20 Boholon Apo Dios nan tagun agaga"ihaw di nomnomona,
21 Nan tatagun hay nappuhiy gunda aton ya umannung an moltaon Apo Dios dida,
22 Nan ma'amnawan ahan an babai ya mi'id di hulbin nan amaphodnah un agguy nanomnoman
23 Hay gamgamon nan maphod an tagu ya maphod di pumbalinana,
24 Nan udum an tatagu ya mun'am'amlongdan umidat hinan mibadang hinan i'ibbada mu ta"on ya ma'ud'udman di inadangyanda damdama,
25 Nan tagun mabanbanadang ya pumhod di nitaguana
26 Idutan nan tataguy mangipo"oy hi bogahnah un way batel ta awni ta nguminay la'una ya unna ukaton,
27 Nan tagun hay maphod an ma'at di anapona ya maphod goh di ma'at ay hiya,
28 Nan tagun hay inadangyanay pangehdolana ya umat hinan nalangun tubuh nan tiyalgaw an magah,
29 Nan tagun hay pamilyanay gunna guluwon ya mi'id ah punhulbianah umangunuh
30 Nan maphod an aton nan nahamad di ugalina ya umat hinan maphod an bungan nan ayiw an dumalat nan pi'taguan,
31 Gulat ta hi Apo Dios ya idatnay lagbun nan maphod di pangatnan tagu ad ugwan an awadanah tun luta