1 Ya tembal Job an inalinay,
2 “Gulat ta makilu tun ligat'u ya tun holholtapo'
3 ya madamdamotda ya un nan panag hinan pingit di baybay.
4 Nan panan Apo Dios ya paddungnay ne'nan ha"in,
5 Un mah mi'id di biyang'un munlili?
6 Ya undan way mamhod an mangihdah nan mihdan mi'id di ahina?
7 Ha"in ya adi' pohdon an onon di umat hinan ma'an ti lummuh dogoh'u!
8 Anaad nin ta adi idat Apo Dios nan odowo' ay Hiya?
9 Ti hay pohdo' ya abulutona ta unna' ni' ubahon,
10 Un adya inila' an patayona' ay Hiya at nunheglay amlong'u
11 Ya mi'id mahkay bi'ah'u, at hay namnamao' mah?
12 Undan umat hinan batuy bi'ah'u,
13 Ha"in ya ten mi'id di bi'ah'u,
14 At un adya makulug an ligwa' da'yu,
15 Mu da'yun liligwa' ya adia' mundenol ay da'yu
16 ti umat ayuh nan ginnaw an wa ay ta ma'anang nan dalallu ya mundatong,
17 mu wa ay ta nan gutud di ugaw ya natdu' an ma'ammaganan.
18 Ya umat ayu goh hinan himpamulog an mumbaat
19 Mun'anap hi danum din mumbaat an nalpud Tema ya ad Sheba,
20 mu gapu ta mi'id di inah'upandah nan ginnaw an mamaga
21 Da'yu ya umat ayuh na ti mi'id ibadangyu
22 Undan way nun'adawa' hi nangalya' hi idatana' ay da'yu?
23 Unu undan way inali' hi bayadanyuy binuhul'u ta way ato' an mabaliwan?
24 Ya undan way nibahhaw hi inat'uh nappuhi?
25 Nan nahamad an panapit an gumilat ya munha'it hi donglon,
26 Ya anaad ta alyonyuh unyu andongon tun hapito' an munligligat,
27 Ya da'yu ya iyu'nuhyu ta way atonyun mangawit hinan nguhu,
28 Mu ad ugwan ya ihamhamadyu ni' an mannig ay ha"in!
29 Nidugah nan gunyu ipa'leh an nappuhin ha"in!
30 Undan waday nappuhih hinapit'u?