1 Ya intuluy Apo Dios an himmapit an inalinay,
2 Inilam dan hi un atnay bulan hi alu'unanda ya unda ma'lum,
3 Ya mundu"undah un dumgoh nan putuda ta way atondan mangi'lum hinan imbaluyda,
4 ya home'on nan imbabaluydah nan inalahan,
5 Hay nangabulut hinan agguy na'amun dongki ta okoddah ayanda?
6 Indat'un dida nan mapulun ta ihinanda,
7 Ya miyadagwidah nan babluy
8 Nan inalahan di panganapandah ononda,
9 Mabalin dan an itamum nan agguy na'amun nuwang,
10 Mabalin dan an eg'odmuy aladuh nan agguy na'amun nuwang
11 Ya mabalin dan an e'kodmuh nan amabi'ahna ta hiyay manamuh nan tamum?
12 Ya kulugom dan an okod hiya ya inyanamutna nan paguy an nagapas,
13 Nan animal an ostrich ya maphod di atonan mangipayagpag hi paya'na,
14 Ya hay umitlugan nan ostrich ya unna ipu'upu' hinan luta ta nan hupu' di mangipadolnat,
15 ya adina iyod'od hi un way mangigatin hi mamhal hinan itlugna,
16 Ya adina halimunan nan imbabaluyna an paddungnay unna bo'on imbaluy,
17 ti agguy'u indatan an Dios hiyah la'eng unu ta"on un ah itang hi nomnom.
18 Mu wa ay ta tumagtag ya abakona nan mabi'bi'ah an kabayu ya nan nuntakay.
19 He"a mah, Job, di nangidat hi bi'ah di kabayu
20 Ya undan mabalin an ipalattu'mu hiyan umat hi aton nan dudun an mabi'ah an lumattu'?
21 ya ehi'adnay hu'inah nan luta ta ipa'innilanay aat di amabi'ahna,
22 Ya mi'id di inilanan tuma'ot unu mun'od'od,
23 Ya nan gina'un di mi'gubat an nitayun hinan bane'engna
24 Ya dumalat nan nidugah an umiyahupana ya nun'alu"ungan nan lutah atona ti umelah,
25 Ya gun ma'agumuhan an homodohdah nan pangngolanah nan gumanghan di talampet,
26 Undan he"ay nangitudtuduh nan gayang hi atonan tumayap
27 Undan he"ay mummandal hinan ongol an hamutin agila
28 Ya nan ata'nang an daplah di punhituwana
29 Ya hidih nan awadana ya unna am'amangon
30 Ya nan bunun an imbabaluyna ya wada ay di mapatoy