1 Ya innaynayun Job an himmapit an inalinay,
2 Mi'id di hulbida ti mi'id di maphod hi atondah ibadangdan ha"in,
3 Ya nidugah ahan di wumigwigandah hinaangda,
4 Ya pumbu'nutda hay way himmangaw hinan mapulun,
5 Ya numpakak nan tatagu didah nan ni'babluyanda,
6 Hay nunhituwanda ya nan liyang hinan daplah,
7 Ya hidih nan mapulun ya ayda animal atog an ahida bubugaw,
8 Mi'id ah hulbida an adida mibilang hi tagu
9 Mu ad ugwan ya ten ikankantaana' hi layah hinan imbabaluyda
10 Ya pahiwona' ti adida ahan meheggon ay ha"in,
11 Manu ay ya ten unna' numbalinon ay Apo Dios an na'akkapuy an mi'id di abalina',
12 Ya hanan nun'appuhiy ugalida ya adida idinong an mamohol ay ha"in,
13 Ya hinawananda nan dalan an pange'wa'
14 Ya numpanga'alidan ha"in
15 At dumalat hana ya nidugah di ta'ot'u,
16 Ya ten magadyuh di ataya' ti ten adi duminong tun holholtapo',
17 ya ilablabinan dumogodogoh tun lewoho',
18 Paddungnay un linapdit Apo Dios di lubung'u
19 Ya paddungnay impa'waha' hinan pito',
20 Mu gunna' munluwalun He"a, O Apo Dios,
21 Nidugah di bumobohholam ay ha"in
22 Ya paddungnay unna' at goh lina"uy,
23 Inila' an hay pohdom ya patayona'
24 Immannung ahan an mi'id ah mamohol hi mangat hi nappuhih
25 Mu unna' dan agguy ni'kilah nan way holholtapona,
26 Ya hay maphod di dedenno' hi ma'at mu bo'on ti un at goh hay nappuhiy na'at,
27 Ya ten adi duminong di aguguluwan di punnomnoma',
28 Munlungdayaa' ti ten ngumitita',
29 mu imbilanga' hi agin di ahuh nan inalahan an ma'alih jakals,
30 Ya ten ngumitit di up'up'u,
31 Ya din hopapna ya hay mun'aphod an tukal di dongdonglo',