1 Ya innaynayun Job an himmapit an inalinay,
2 “Un ni' ahan tun atagu' ad ugwan
3 Ti binadangana' ay Hiyah din hopapna,
4 Ya mibangngad ni' goh din a'unga' an amaphod di nitagua',
5 Hidin ninidduman Apo Dios ay ha"in ya wadada goh din imbabaluy'un neheheggon ay ha"in,
6 ya do'ol di gatas an malpuh nan baka' ya nan gandeng'u,
7 Ya wa ay ta na'amung din nun'anomnoman an mumpangipangpangulu
8 Ya wa ay goh ta tigona' hidin ungunga ya mun'ahligda ta wayaana',
9 Ya wa ay goh ta tigona' hidin mumpangipangpanguluh nan tatagu ya timma'dogda,
10 Ya ta"on un din u'upihyal hinan babluy an nun'abagtuy haadda
11 An amin din nangngol hinan hinapit'u ya ene'gonana',
12 Ti manu ay ya binadanga' nan nun'awotwot hinan mahapulda,
13 Ya din mun'agadyuh an matoy ya binadanga' goh dida,
14 Ya nan ina'inat'u an nahamad di paddungnay lubung'u,
15 Ya binadanga' nan nun'abulaw ya nan nun'apilay
16 Ya ha"in di paddungnay hi aman nan nun'awotwot,
17 Ya pinogpog'uy bi'ah nan tatagun mangamangat hi pumbaholan,
18 Hay ninomnom'u ya matubayana',
19 Ya umata' hinan ayiw ta nan lamut'u ya umatam hinan way danum
20 At nan ipabagtua' ya minaynayun,
21 Ti wa ay ta himmapita' an muntugun ya didindinongda nan tuguno'
22 Ya wa ay ta lempah'un nuntugun ya mi'id ah mangdum
23 Hin'umu'udduman hehennodday humapita' goh ay dida
24 Ya wa ay ta munlungdayada ya inimiha' dida
25 Ha"in ya intudu' di maphod hi atondan paddungnay un ha"in di panguluda