1 Ya tembal Job an inalinay,
2 “Gulat ta pohdom an umal'alu' at mahapul donglom tun hapito'.
3 Anuham ni' ta humapita' ta engganah un'u lopahon
4 Undan nan tataguy punlilia' an un hi Apo Dios?
5 Un adya tigonyuy aat'u at manoh'a ayu,
6 Ya wa ay ta nomnomo' di aat nan na'at ay ha"in
7 Mu anaad ta nan tatagun nun'appuhiy ato'atonda ya mi'taguda ta engganay unda mun'ala'ay,
8 Ya tigonda nan imbabaluydan mun'ahlag,
9 Ya mi'id di al'alih nan numpunhituwanda,
10 Nan manilhig an bakada ya maphod di pangundulda,
11 Ya tuminnagtag an umanay'ayam nan imbabaluyda
12 Ya gunda mungkantan iyunnuddah nan tukal di tambourine ya alpa,
13 Ya maphod di nitaguanda ti adangyandah tun ataguda,
14 Ti alyondan Apo Dios di,
15 Undan hay aat nen Dios ta mahapul an itamuanmi Hiya?
16 Inaliday un nan immadangyananda ya hay nalpuh nan intamuanda,
17 Anaad mah ta adi moltaon Apo Dios dida?
18 Ya anaad mah ta adina moltaon dida
19 Ya inalim un moltaon Apo Dios nan ung'ungungngan dumalat nan numbaholan amana,
20 Maphod hi un holtapon nan gun mumbahol di moltada
21 Ti gulat ta malpah an matoyda
22 Undan way abalinan di tagun mangitudun Apo Dios?
23 Nan udumnan tatagu ya mi'id di al'alih ma'at ay didah engganah atayanda,
24 ya mun'am'amlongda ti wadan amin di mahapuldah nitaguanda,
25 Ya nan udumnan tatagu ya nun'awotwotda
26 Mu waday apogpogan tu'un amin ti mun'atoy tu'u ya nun'ilubu' tu'u,
27 Inila' di nappuhin wah nan nomnommu an pamihulmun ha"in
28 ti hay ibagam ya alyom di,
29 Mu gulat ta baganyu nan numbaat
30 an nan tatagun nappuhiy gunda aton di maliblih nan gutud di bumungtan
31 Ya mi'id di mamahiw hinan numbaholanda,
32 Ya wa ay ta iyuyda ilubu' hinan ilubu'ana an ma'a'adugan
33 ya nidugah an do'ol di mitnud an umuy munlabun,
34 At hay atom an mangal'alu' ay ha"in hinan mi'id hulbinan panapitmu?