1 Ya intuluy Job an himmapit an inalinay,
2 Ya adim alyon hi un'a nala'la'eng ya un ha"in
3 At hay pohdo' hi pi'hapita' ya hi Apo Dios an na'abbagbagtu an bo'on da'yu,
4 Ya unna' ahan inlayalayahan ay da'yu
5 At hay maphod hi atonyu ya un ayu didindinong
6 Unyu donglon nan ibaga',
7 Undan hay nappuhi ya layah di hapitonyuh pangihtiguyun Apo Dios?
8 Undan da'yuy way biyangnan mangihtiguh aat di amaphodan Apo Dios,
9 Undan makulug an mi'id ah mattig Apo Dios hi nappuhin aatyu?
10 Ta"on hi unyu ipo"oy nan atonyun mangipangngel hi pangihtiguyuh aat Apo Dios
11 Ya undan adi da'yu ipata'ot hinan nidugah an ana'abbagbagtuna,
12 Nan panapityu an nipa"el ya mi'id di ibadangna
13 At duminong'a ta okoda' an mi'hapit
14 Ha"in ya adia' tuma'ot,
15 Ya ta"on hi unna' patayon ay Apo Dios ya Hiya damdamay kulugo',
16 At olom man ya hiyay dumalat hi abaliwa' ti inila' an mi'id di bahol'u,
17 At ihamadyun donglon nan hapito' ta innilaonyuy alyo':
18 Ha"in ya indadaan'uy aat nan idiklamu'
19 Wada mah di mabalin an mi'hannun ha"in an dumalat ete?
20 Un duwa ya anggay di mahapul hi ibaga' ay He"an Dios'uh adim aton ay ha"in,
21 Idinongmu ni' nan pummoltaam ay ha"in,
22 At humapit'an ha"in ta tabolo',
23 Undan atnay inat'uh nibahhaw hi numbahola'?
24 Anaad ahan ta adi'a mipattig ay ha"in
25 Ya anaad ta ta'ta'tona' an ten mi'id di hulbi' an umata' hinan paya' an nalyaw an punggilitam,
26 Nidugah nan ipabaholmun ha"in
27 Paddungnay unmu hinawid di hu'i',
28 At hay aatna mah ya unna' mun'ulay an matoy an umat hinan nadunut an ayiw,